Ábdimurat Atajanov
| Ábdimurat Atajanov | |
|---|---|
| Tuwılǵan sánesi | 17-yanvar 1938-jılı (87 jasta) |
| Tuwılǵan jeri | Tolıs awılı, Qattıaǵar xojalıǵı, Nókis rayonı |
| Dóretiwshilik túri | proza |
| Oqıǵan jeri |
|
| Shıǵarmalarınıń tili | qaraqalpaq tili |
| Ataqları | «Ózbekstan Respublikasına miyneti sińgen mádeniyat xızmetkeri» |
| Sıylıqları | Qaraqalpaqstan Jazıwshılar awqamı sıylıǵı |
Ábdimurat Atajanov (Әбдимурат Атажанов; 1938-jıl 17-yanvar, Nókis rayonı) — balalar jazıwshısı. «Ózbekstan Respublikasına miyneti sińgen mádeniyat xızmetkeri».
Ómir hám miynet jolı
[redaktorlaw | derekti redaktorlaw]Á. Atajanov 1938-jılı 17-yanvarda Nókis rayonına qaraslı «Qattıaǵar» xojalıǵı «Tolıs» awılında tuwılǵan.
Ol 1957-jılı Nókis awılxojalıǵı texnikumın, 1964-jılı Qaraqalpaq mámleketlik pedagogikalıq institutın tamamladı.
1957-59-jılları mektepte muǵallim bolıp isleydi. 1964-jıldan «Jetkinshek» gazetasında ádebiy xızmetker, soń bólim baslıǵı, «Ámiwdárya» jurnalınıń bólim baslıǵı (1972-75), «Jetkinshek» gazetasınıń redaktorı (1975), «Ustaz» (sońınan «Ustaz jolı») gazetasınıń bas redaktorı (1998-2002) bolıp isledi, házirgi waqıtta usı gazetada bas redaktordıń orınbasarı lawazımında islep atır.
Á. Atajanov 1977-jıldan Jazıwshılar awqamınıń aǵzası.
Dóretiwshiligi
[redaktorlaw | derekti redaktorlaw]Prozası
[redaktorlaw | derekti redaktorlaw]Jazıwshınıń birinshi gúrrińi «Etik» 1961-jılı «Jetkinshek» gazetasında basılıp shıqtı.
Házirge shekem ol «Duwtar» (1976), «Atamákan» (1978), «Jeti xat» (1981), «Qos kanikulda» (1983), «Sapalaq palwan» (1984), «Pikassonıń aq kepteri» (1986), «Sońǵı jawǵan qar» (1987), «Mashqala» (1988), «Pátpelektey pálpellegen dostım-ay» (1994), «Qaytıp keliw» (1996), «Jiyde jegiń kele me» (1997) sıyaqlı gúrriń hám povestler toplamların bastırıp shıǵardı. 2010-jılı jazıwshınıń «Jat jurtta japa shekken adam» ádebiy maqala, gúrriń, ocherkten quralǵan toplamı jarıq kórdi.
Awdarmashılıǵı
[redaktorlaw | derekti redaktorlaw]Á. Atajanov M. Sholoxov, S. Baruzdin, B. Polevoydıń, Sh.Beyshanalievtiń, S. Axmad, O. Omarbekovlardıń gúrriń hám povestlerin qaraqalpaq tiline awdarǵan. Jazıwshınıń bir qatar shıǵarmaları ózbek, qazaq, túrkmen, tatar, noǵay, avar, bashkurt hám orıs tillerinde jarıq kórgen.
Jetiskenlikleri
[redaktorlaw | derekti redaktorlaw]Á.Atajanov «Ózbekstan Respublikasına miyneti sińgen mádeniyat xızmetkeri» húrmetli ataǵına iye.
Ol 1987-jılı «Pikassonıń aq kepteri» gúrrińler toplamı ushın Qaraqalpaqstan Jazıwshılar awqamınıń sıylıǵına miyasar bolǵan.
Jazıwshı bir neshe mártebe Qaraqalpaqstan Respublikası Joqarǵı Keńesiniń húrmet jarlıǵı menen sıylıqlanǵan.
Ádebiyatlar
[redaktorlaw | derekti redaktorlaw]- Қарақалпақстан Республикасы жазыўшылары (библиографиялык мағлыўмат) / нашрга тайёрловчи 3. Бекбергенова -T .: Extremum press , 2011. 240 бет. ISBN 978-9943-356-45-0