Áwezxan dástanı

«Áwezxan» dástanı — xojelishi Allayar Sadimovtan 1966-jılı Keńesbay Satullaev tárepinen jazıp alınǵan (R-206, №61051). «Áwezxan» «Góruǵlı» ciklindegi dástanlardıń eń elewlileriniń biri. Onıń qıssaxan Saparpiyaz Xábiypnazarov variantı 1986-jılı qaraqalpaq folklorı kóp tomlıǵınıń XV-tomında jarıq kórdi. Házirgi tayarlanǵan variant hesh jerde járiyalanbaǵan. Dástan «Goruǵlı» ciklindegi baska dástanlarday qaharmanlıq motivlerge tiykarlanǵan. Áwezxan dástanda adamǵa pitiwi mumkin bolǵan batırlıqtıń, mártliktiń, sulıwlıqtıń, hasıl pazıyletlerdin ulgisi dárejesinde korinedi. Onıń óz watanına sadıklıǵı, onı kózdiń qarashıǵınday asırawǵa tayyar turıwı, óz elin-jurtın azat hám abadan makanǵa aylandırıwı dástannıń ideyalıq hám kórkemlilik nátiyjelerin támiyileydi.