Írzamurat Aybatov

Írzamurat Aybatov
Ырзамурат Айбатов
Tuwılǵan sánesi	1960-jılı(1960)
Tuwılǵan jeri	Qaraqalpaqstan
Qaytıs bolǵan sánesi	27-sentyabr 2020-jılı(2020-09-27)
Qaytıs bolǵan jeri	Nókis
Puqaralıǵı	Ózbekstan
Kásibi	aktyor, rejissyor
Oqıǵan jeri	Tashkent mámleketlik teatr hám súwretshilik kórkem óneri institutı
Iskerlik jılları	1982–2020
Sıylıqları	Ózbekstan Respublikasında xızmet kórsetken mádeniyat xızmetkeri (2011)

Aybatov Írzamurat (Ырзамурат Айбатов; 1960 — 2020-jıl 27-sentyabr, Nókis) — qaraqalpaq aktyorı hám rejissyorı. Ózbekstan Respublikasında xızmet kórsetken mádeniyat xızmetkeri (2011). Ol ómiriniń 38 jılın qaraqalpaq teatr kórkem ónerine baǵıshlaǵan.

Ómiri hám bilimi

Írzamurat Aybatov 1982-jılı Tashkent mámleketlik teatr hám súwretshilik kórkem óneri institutın tamamlaǵan. Oqıwdı pitkergennen keyin bir topar qaraqalpaq jasları menen birge Qaraqalpaq mámleketlik jas tamashagóyler teatrına jumısqa kelgen.

Iskerligi

Aktyorlıq iskerligi

Iskerligin teatr aktyorı sıpatında baslaǵan Í. Aybatov 100 den aslam hár túrli obrazlar jarattı. Onıń eń belgili rolleri:

• K. Raxmanovtıń «Toǵız tońqıldaq, bir shinkildek» spektaklinde — Allaniyazbay;
• S. Xojaniyazovtıń «Úmit ushıqınları»nda — Diyqan;
• S. Jumaǵulovtıń «Adamlar qalay buzılǵan» shıǵarmasında — Wazir;
• «Kúyewińdi berip tur» spektaklinde — Manas;
• K. Goldonidiń «Eki bayǵa bir malay» komediyasında — Silvio;
• J. B. Molyierdiń «Skapenniń hiylesi»nde — Silvestr.

Rejissyorlıq iskerligi

2005-jılı teatrǵa bas rejissyor etip tayınlandı. Óziniń rejissyorlıq iskerligi dáwirinde 40 tan aslam hár túrli janrdaǵı spektakllerdi saxnalastırdı. Atap aytqanda:

• «Ómir esik artında» (S. Saloxitdinov);
• «Kúyewler konkursı» (X. Muxammed hám A. Azizxojaev);
• «Anajanım, anam» (F. Babajanov);
• «Kempirge talas» (Q. Mátmuratov);
• «Arapasat maydanı» (Á. Ótepbergenov);
• «Awılǵa qaytıw» (P. Aytmuratov).

Xalıqaralıq festivallar

Onıń basshılıǵındaǵı teatr jámááti birneshe xalıqaralıq festivallarda tabıslı qatnastı:

• 2007-jılı Ashxabadta (Túrkmenstan) «Milliy folklor hám teatr óneri» festivalı;
• 2007-jılı Kairde (Mısr) XIX «Xalıqaralıq eksperimental teatrlar» festivalı;
• 2011-jılı Ózbekstan teatrları arasındaǵı «Seni jırlaymız, zamanlas!» kórik-festivalı.

Sıylıqları

Teatr kórkem ónerindegi kóp jıllıq xızmetleri ushın 2011-jılı «Ózbekstan Respublikasında xızmet kórsetken mádeniyat xızmetkeri» húrmetli ataǵı menen sıylıqlandı.

Esteligi

Aktyor 2020-jılı 60 jasqa tolıwı qarsıńında qaytıs boldı. 2021-jıl 11-yanvarda teatrda onıń yubileyine arnalǵan ««Teatr — meniń ómirim»» atlı eslew keshesi ótkerildi.

Kásibi hám kásiplesi L. Xalqnazarova onı bılay dep eske aladı:

«Ol sonıńday kewli pák, kewlinde girbińi joq insan edi. Eger balalar ushın spektakller saxnalastırsa ózi de biyǵubar balalıq shaqlarına qaytıp qalǵanday kóriner edi...»