Úbbiniyaz Áshirbekov

Úbbiniyaz Áshirbekov
Jeke maǵlıwmatları
Tuwılǵan sáne	21-aprel 1944-jılı(1944-04-21)
Tuwılǵan jeri	Taxtakópir rayonı
Qaytıs bolǵan sáne	15-mart 2025-jılı(2025-03-15) (80 jasta)

Úbbiniyaz Áshirbekov (Үббинияз Әширбеков; 1944-jıl 21-aprel, Taxtakópir rayonı, Dawqara awılı, Qaraqalpaqstan ASSR, Ózbekstan SSR, SSSR) – Qaraqalpaqstan mámleketlik hám siyasıy ǵayratkeri, Ózbekstan Respublikası awıl-xojalıǵı ministrligi hám Ózbekstan Respublikası Qurılıs ministrliginiń orınbasarı, qala hákimi. Taxtakópir rayonı, Araldı qutqarıw xalıqaralıq fondı Atqarıw komiteti Nókis filialı direktorı, 1992—1997-jıllar aralıǵında Qaraqalpaqstan Respublikası Joqarǵı Keńesi baslıǵı. 1969-jılı Tashkent awıl xojalıǵın irrigaciyalaw hám mexanizaciyalastırıw institutın tabıslı tamamlaǵannan soń dáslepki miynet jolın «Qaraqalpaqirsovxozqurılıs» basqarmasınıń Qaraózek rayonındaǵı 23-kóshpeli mexanizaciyalasqan kolonnasında aǵa injener bolıp islewden basladı. Bunnan keyingi dáwirde, 1970-1971-jılları «Qaraqalpaqsuwqurılıs» trestiniń Taxtakópir kóshpeli mexaniyazaciyalasqan kolonnasınıń óndiris texnika bóliminiń baslıǵı, 1971-jıldan baslap 12-awıllıq qurılıs trestiniń Taxtakópirdegi 51-kolonnasınıń bas injeneri, 1973-jıldan usı kolonnanıń baslıǵı bolıp nátiyjeli jumıs alıp bardı. Ú.Áshirbekov 1982-jıldan Ózbekstan partiya Oraylıq komiteti qurılıs bólimi instruktorı, 1984-jıldan baslap Ózbekstan awıllıq qurılıs ministriniń orınbasarı bolıp nátiyjeli jumıs alıp bardı.

Qánige Ú.Áshirbekov 1986-jıldan baslap Qaraqalpaqstan Respublikasınıń suw xojalıǵı tarawına basshılıq etti. 1990-1991-jılları Taxtakópir rayonın basqardı. Ǵárezsizligimizdiń dáslepki jıllarında, yaǵnıy 1991-1992-jılları Taxtakópir rayonlıq Keńesiniń baslıǵı, Taxtakópir rayonı hákimi lawazımında jumıs alıp bardı.

Ásirese, 1992-jıldan baslap Qaraqalpaqstan Respublikası Joqarǵı Keńesiniń baslıǵı bolıwday juwapkerli lawazımda tabıslı miynet etti.

Úbbiniyaz Áshirbekovtıń basshılıǵında 1992-jıl 14-dekabrde «Qaraqalpaqstan Respublikasınıń Mámleketlik bayraǵı haqqında»ǵı Nızam, 1993-jıl 9-aprel kúni Qaraqalpaqstan Respublikasınıń Konstituciyası hám Qaraqalpaqstan Respublikasınıń məmleketlik gerbi, 1993-jıl 24-dekabrde «Qaraqalpaqstan Respublikasınıń mámleketlik gimni haqqında»ǵı Nızamları qabıl etilgen.

1997-2013-jıllar aralıǵında Xalıqaralıq Araldı qutqarıw fondı Atqarıw komitetiniń Nókis filialı baslıǵı bolıp xızmet etti. 2013-jılı húrmetli dem alısqa shıqqannan soń bunnan keyingi dáwirde respublikadaǵı jas qánigelerge ustazlıq etti.

Úbbiniyaz Áshirbekovtıń kóp jıllıq xızmetleri ılayıqlı bahalanıp, «Doslıq» ordenine, «Qaraqalpaqstan Respublikasına xızmet kórsetken irrigator» húrmetli ataǵına múnásip dep tabıldı.

Ádebiy iskerligi

Ú. Áshirbekov poeziya jónelisinde de qálem terbetip, 2010-jılı «Watan topıraǵı» atlı poeziyalıq toplamın shıǵardı.