Abat Áliev
| Abat Áliev | |
|---|---|
| Tuwılǵan sánesi | 25-oktyabr 1930-jılı |
| Tuwılǵan jeri | Qamısarıq awılı, Shımbay rayonı |
| Qaytıs bolǵan sánesi | 2012-jılı |
| Dóretiwshilik túri | proza |
| Ataqları | «Qaraqalpaqstan xalıq jazıwshısı» (1992) |
Abat Áliev (1930-2012) — jurnalist, jazıwshı hám ádebiyatshı alım. «Qaraqalpaqstan xalıq jazıwshısı» (1992).
Ómir jolı
[redaktorlaw | derekti redaktorlaw]A. Áliev 1930-jılı 25-oktyabrde Shımbay rayonınıń Qamısarıq awılında tuwılǵan. Ol 1951-jılı Qaraqalpaq mámleketlik pedinstitutın tabıslı tamamlap, «Sovet Qaraqalpaqstanı» gazetasında ádebiy xızmetker, 1959-62-jılları aspiranturada oqıdı. Sońınan ÓzKP Qaraqalpaqstan Obkomında instruktor (1962-64), «Ámiwdárya» jurnalında bas redaktor (1964-66), Qaraqalpaq mámleketlik pedinstitutında aǵa oqıtıwshı, docent (1966-74), N. Dáwqaraev atındaǵı Til hám ádebiyat institutında ilimiy xızmetker (1974-76), «Sovet Qaraqalpaqstanı» gazetasında bólim baslıǵı (1976-81), «Ámiwdárya» jurnalınıń bólim baslıǵı (1985-90), J. Orınbaev atındaǵı pedagogikalıq ilim izertlew institutında aǵa ilimiy xızmetker, Qaraqalpaqstan Jazıwshılar awqamınıń juwaplı xatkeri lawazımlarında isledi.
A. Áliev 1963-jıldan Jazıwshılar awqamınıń aǵzası.
Dóretiwshilik jolı
[redaktorlaw | derekti redaktorlaw]A. Áliev 1965-jılı «Qaraqalpaq dástanı «Máspatsha» degen temada kandidatlıq dissertaciyasın jaqladı.
A. Álievtin «Jaslıq jiger» (1956), «Baxıt ushın gúres» (1959), «Biziń awıldıń jigiti» (1961), «Kútken kún» (1963), «Shınlıq shejiresi» (1973), «Meniń Gúljamalım» (1974), «Ómir táshwishleri» (1987), «Parız» (1988), «Kórmegenimiz kóp eken» (1991), «Dúnyanıń qızıǵı» (1993), «Mártlik» eske túsiriw kitabı (P. Xalmuratov haqqında, 2005) degen gúrriń, povest hám romanları shıqtı. Ol bir neshe tuwısqan xalıqlar jazıwshılarınıń dóretpelerin qaraqalpaq tiline awdarǵan.
Jetiskenligi
[redaktorlaw | derekti redaktorlaw]A. Áliev Qaraqalpaqstan Respublikası Joqarǵı Keńesiniń Húrmet Jarlıǵı menen sıylıqlaǵan, 1992-jılı «Qaraqalpaqstan xalıq jazıwshısı» húrmetli ataǵına iye boldı.
Ádebiyatlar
[redaktorlaw | derekti redaktorlaw]- Қарақалпақстан Республикасы жазыўшылары (библиографиялык мағлыўмат) / нашрга тайёрловчи 3. Бекбергенова -T .: Extremum press , 2011. 240 бет. ISBN 978-9943-356-45-0