Sıńsıw

Sın'sıw qız uzatılıp ketiw aldında qız ta'repinen aytılg'an. Ma'selen ha'wjar qosıg'ı uzatılıwshı qızdın' dosları, qurdasları menen yaki ko'pshilik bolıp xor menen aytılsa, sın'sıw uzatılıwshı qızdın' jeke o'zi ta'repinen atqarıladı. Qızlar uzatılıp ketip baratırg'anda o'z tuwılıp o'sken u'yi, ata-anası, tuwg'an-tuwısqanları, awıl-eli menen xoshlasıp sın'sıp qosıq aytqan. Mısalı:

Kerilip o'sken keregem,
Buralıp o'sken bosag'am,
Shayqalıp o'sken shan'lag'am,
Shayıljıg'an el-atım,
To'rden de shıg'ıp baraman,
Esikten orın alaman,
Atası basqa jat elde,
Ne qılıp kele bolaman.

Solay etip sın'sıw (nalısh) qosıg'ında qız endigi baratug'ın u'ydin' adamlarının' minez qulqın, jag'day ta'rtibin bilmegenlikten qıynalıp nalısh etedi, ja'ne de sın'sıw qosıg'ında o'zinin' jaqın adamaları menen jılap xoshlasadı.

Sın'sıw qosıqları ha'zirgi zamanımızda aytılmag'an menen burıng'ı da'wirdegi xalqımızdın' qız uzatıw toyında uzatılıwshı qız ta'repinen ishki mun'ın, debdiwin shıg'arıp aytıwı da'stu'r bolg'an. Sonlıqtan sın'sıw qosıqları biybaha miyrasımız sıpatında sın'sıw qosıqları bu'gingi kunimizge jetip otır.