Ashıq-Nájep dástanı

«Ashıq-Nájep» dástanınıń Qarajan baqsı Qabulov variantı 1960-jılı Qabıl Maqsetov tárepinen jazıp alınǵan. Házir bul variant jalǵız nusqa sıpatında ÓzR IA QB kitapxanasınıń qoljazbalar fondında saqlawlı. 1986-jılı qaraqalpaq folklorınıń kóp tomlıǵında Q. Maqsetov, A. Álimovlar tárepinen tayarlanıp járiyalanǵan.

Dástan mazmunı jaǵınan liro-epikalıq dástanlar qatarına kiredi. Ondaǵı waqıyalardıń barlıǵı derlik saz hám sáwbettiń járdeminde qáliplesedi, rawajlanadı hám óz sheshimlerin tabadı. Xalqımızdıń ruwqıy hám materiallıq mádeniyatınıń óz-ara jupkerleskendegi sán-saltanatın, tásirsheńligin sáwlelendiretuǵın epizodalar menen syujetlerge oǵada bay. Saz ásbaplarına, sóz qádirine bolǵan xalıqlıq húrmet-ıqlastıń úlgileri ayrıqsha kózge taslanadı.