Ayt sen Ájiniyazdıń qosıqlarınan

Ayt sen Ájiniyazdıń qosıqlarınan

Ayt sen Ájiniyazdıń qosıqlarınan

Jılasın yar ıshqı bawırın keskenler

Eńiresin elinen ayra túskenler

Ayt sen Ájiniyazdıń qosıqlarınan

Sazın samal yadlap, sózin el bilgen

Bir shayır dúnyaǵa keldide ketti

Tal artınan tolǵan ayǵa telmirgen

Bir dilbar túsime endide ketti

Qosıq dárya-dárya nur bolıp aqsın

Ishqısız janlarǵa ıshq otın jaqsın

Qız jigitke jilwa naz benen baqsın

Ayt sen Ájiniyazdıń qosıqlarınan

Ayt sen Bozatawdı namaǵa salıp

Jılamaǵannıń bawırı tas bolsın

Qaraqalpaqtıń góne dárti qozǵalıp

Shadlı dáwranına búgin más bolsın

Shayır gezgen shólde bostanlar bayıp

Ǵamlı kúnler boldı kózlerden ǵayıp

Bir ilxam perisin kórdim ájayıp

Ayt sen Ájiniyazdıń qosıqlarınan

Juldızlardı jerge úńiltpek bolsań

Jaman shayırlardı túńiltpek bolsań

Eger men ólgende tiriltpek bolsań

Ayt sen Ájiniyazdıń qosıqlarınan