Bozjigit dástanı

«Bozjigit» dástanın 1939-jılı S.Máwlenov, Sh.Xojaniyazovlar xalıq jırawı Qurbanbay Tájibaevtan jazıp alǵan (P-432 №164776). Dástan qaraqalpaq folklorı kóp tomlıǵınıń XV tomında (1686-j.) járiyalanǵan. Mazmunı jaǵınan liro-epikalıq dástanlar toparına kiredi. Biraq Bozjigittiń óz ashıǵınıń qolına erisiw jolındaǵı shekken mashaqatları qaharmanlıq syujetlerdi esletedi. Dástanda eki ashıqtıń bir-birine bolǵan múnásebetleri bir neshe mártebe sınalǵannan keyin de olardıń jolında tosqınlıqlar kúsheyip waqıyalardıń shiylesiwi barısında tragediyalıq halat júzege keledi hám dástan Bozjigit penen Sahıpjamaldıń ólimi menen juwmaqlanadı. Dástan shıǵıs xalıqlardıń maqtanıshı bolǵan «Zuhra-Tayır», «Láyli-Májnún» sıyaqlı iri liro-epikalıq dástanlardıń mazmunları menen sıbaylas keledi.