Dáwletmurat Allanazarov
| Dáwletmurat Allanazarov | |
|---|---|
 | |
| Tuwılǵan sánesi | 9-aprel 1957 |
| Tuwılǵan jeri | Nókis qalası |
| Qaytıs bolǵan sánesi | 16-iyul 2026 (69 jasta) |
| Ilimiy tarawı | muzıka |
| Jumıs orınları | NMPI |
| Ilimiy ataǵı | professor |
| Sıylıqları |
|
Allanazarov Dáwletmurat Tóreshovich (Дәўлетмурат Алланазаров; 1957-jıl 9-aprel, Nókis qalası — 2026-jıl 16-iyul) — Ózbekstan xalıq bilimlendiriw aǵlası, Qaraqalpaqstan Respublikasına miyneti sińgen kórkem óner ǵayratkeri, qaraqalpaq xalqınıń milliy alamoynaq duwtarı sazların notaǵa túsirgen belgili ilimpaz, professor[1].
Ómirbayanı hám miynet jolı
[redaktorlaw | derekti redaktorlaw]Dáwletmurat Allanazarov 1957-jıl 9-aprelde Nókis qalasında tuwılǵan. Ol jaslıǵınan kórkem óner hám muzıkaǵa ayrıqsha ıqlas qoydı hám usı baǵdarda bilim aldı.
Dáslepki miynet jolın 1975-jılı Nókis mámleketlik muzıka-xoreografiyalıq oqıw ornında ulıwma fortepiano oqıtıwshısı, koncertmeyster sıpatında baslanǵan bolsa, 1982-jıl Tashkent mámleketlik konservatoriyasınıń kúndizgi bólimin tabıslı tamamladı.
Oqıwın pitkerip kelgennen keyin dáslepki jumıs ornında fortepiano oqıtıwshısı, koncertmeyster, keyin ala Berdaq atındaǵı Qaraqalpaq mámleketlik muzıkalı teatrında simfoniyalıq orkestr dirijyorı bolıp jumıs isledi hám respublikalıq kólemdegi úlken koncertlerde, qońsılas mámleketlerde ótkerilgen xalıqaralıq ilajlarda belsene qatnastı.
1993-jıldan usı kúnge shekem Ájiniyaz atındaǵı Nókis mámleketlik pedagogikalıq institutında assistent-oqıtıwshılıqtan kafedra professorı dárejesine shekem qábiletli jaslarǵa bilim berip, elimizdiń kórkem óner tarawınıń rawajlanıwı, joqarı potenciallı maman qánigeler menen támiyinleniwi, sonday-aq, ilimiy jaqtan izertleniwine salmaqlı úles qostı[2].
Ilimiy izleniwleri
[redaktorlaw | derekti redaktorlaw]Ilimiy izleniwleri dawamında milliy qádiriyatlarımızdı qayta tiklew hám keleshek áwladlarǵa jetkerip beriw baǵdarında úlken nátiyjelerge eristi.
Dáwletmurat Allanazarov kóp dáwirlerden berli ustazdan shákirtke shınjırma-shınjır ótip kiyatırǵan qaraqalpaq milliy alamoynaq duwtarı namaları ústinde izlenip, olardı notaǵa túsirdi. Bunıń nátiyjesinde «Qaraqalpaq xalıq sazları», «Qaraqalpaq sazları (duwtar)» hám «Altın miyras» atamasındaǵı oqıw qollanbaları, balalar muzıka hám kórkem óner mektepleriniń 1-, 2-, 3-, 4- hám 5-klassları ushın arnalǵan «Qaraqalpaq milliy alamoynaq duwtarı sazendeshiligi sabaqlıǵı» atamasındaǵı kitabı baspadan shıqtı. Sonıń menen birge, onıń avtorlıǵında joqarı hám orta arnawlı oqıw orınları ushın «Qaraqalpaq ırǵaqları» hám «Qosıq aytsam» atamasındaǵı oqıw qollanbaları baspaǵa tayarlandı.
Xalıqaralıq shólkemler tárepinen járiyalanǵan joybarlar sheńberinde Ózbekstan Ilimler akademiyası Qaraqalpaqstan bólimi fondında saqlanıp kiyatırǵan xalıq qosıqları jáne dástanların jańalaw hám zamanagóy audiojazıwlarǵa túsiriw jumıslarına belsene qatnastı.
Kóplegen ilimiy maqalaları hám tezisleri «Xabarshı», «Ámiwdárya», «Ilim hám jámiyet», «Ózbekstan pedagogikalıq ilimiy-izertlew institutı» jurnallarında, respublikalıq hám xalıqaralıq konferenciyalar toplamlarında jarıq kórdi[3].