Edilbay Akimov

Edilbay Akimov
Едилбай Қурбанбаевич Акимов
Tuwılǵan sánesi	13-mart 1979(1979-03-13)
Tuwılǵan jeri	Shımbay rayonı, Qaraqalpaqstan
Qaytıs bolǵan sánesi	30-mart 2026(2026-03-30) (47 jasta)
Kásibi	qosıqshı, kompozitor, baqsı
Oqıǵan jeri	Berdaq atındaǵı Qaraqalpaq mámleketlik universiteti
Iskerlik jılları	2001–2026
Sıylıqları	«Shuxrat» medalı (2020)
Ataqları	«Mádeniyat hám kórkem óner pidayısı» kókirek belgisi (2023)

Edilbay Qurbanbayevich Akimov (Едилбай Қурбанбайевич Акимов; 1979-jıl 13-mart, Shımbay rayonı — 2026-jıl 30-mart) — qaraqalpaqstanlı talantlı kompozitor, baqsı hám qosıqshı. «Jigitler» toparınıń solisti.

Ómiri hám iskerligi

Edilbay Akimov 1979-jılı 13-martta Qaraqalpaqstannıń Shımbay rayonında dúnyaǵa kelgen. 2003-jılı Berdaq atındaǵı Qaraqalpaq mámleketlik universitetin tabıslı tamamlaǵan.

Miynet jolın Nókis qalasındaǵı Esjan baqsı atındaǵı 1-sanlı balalar muzıka hám kórkem óner mektebinde muǵallimlikten baslaǵan. Bul dáwirde ol balalar ushın bir neshe muzıkalıq shıǵarmalar dóretti.

Iskerligi

Edilbay Akimov kóp jıllar dawamında tómendegi jámáátlerde nátiyjeli xızmet etti:

• Ózbekstan mámleketlik filarmoniyası Qaraqalpaqstan Respublikası bóliminiń «Ámiw tolqını» hám «Gúlzar» folklor ansambllerinde sazende;
• 2001-jıldan baslap «Jigitler» estrada toparınıń aǵzası;
• 2017-jıldan «Ayqulash» Qaraqalpaq mámleketlik milliy folklor ansambliniń sazendesi;
• 2021-jıldan Ózbekstan mámleketlik filarmoniyası Qaraqalpaqstan Respublikası bóliminiń «Muxalles» duwtarshılar ansambliniń kórkemlik jaqtan basshısı.

Dóretiwshiligi

Talantlı kompozitor sıpatında ol súyip tıńlanatuǵın bir neshe namalardıń avtorı esaplanadı. Onıń repertuarınan «Ǵarip ashıq», «Sayatxan Hámre» dástanları, sonday-aq «Duwtarım», «Ne bilsin», «Muń qalmas», «Ne tiler», «Arıwxan», «Jeke baslı», «Jeti asırım», «Ellerim bardı», «Qaraqalpaqta», «Nalısh», «Naz benen», «Bes perde» sıyaqlı xalıq qosıqları orın alǵan.

Sıylıqları

Qaraqalpaqstan mádeniyatı hám kórkem ónerindegi xızmetleri ushın tómendegi mámleketlik sıylıqlar menen sıylıqlanǵan:

• «Shuxrat» medalı (2020-jıl);
• «Mádeniyat hám kórkem óner pidayısı» kókirek belgisi (2023-jıl).

Qaytıs bolıwı

Edilbay Akimov 2026-jılı 30-mart sánesinde 47 jasında (mezgilsiz) dúnyadan ótti.