Gúlayım Tursınova

Gúlayım Tursınova
Tuwılǵan sánesi	10-aprel 1954-jılı(1954-04-10) (70 jasta)
Tuwılǵan jeri	Xojent wálayatı, Tájikstan
Dóretiwshilik túri	proza, dramaturgiya
Oqıǵan jeri	M.Gorkiy atındaǵı ádebiyat institutı (Moskva)
Birinshi kitabı	«Shuǵla» (1975)
Ataqları	«Qaraqalpaqstan Respublikasına miyneti sińgen mádeniyat xızmetkeri» (2007)

Gúlayım Tursınova (1954-jıl 10-aprel) — jazıwshı. «Qaraqalpaqstan Respublikasına miyneti sińgen mádeniyat xızmetkeri» (2007).

Ómir hám miynet jolı

G. Tursınova 1954-jılı 10-aprelde Tájikstannıń Xojent wálayatında tuwılǵan.

Orta mektepti pitkergennen keyin «Jetkinshek» gazetasında, Qaraqalpaqstan Jazıwshılar awqamında jumıs isledi.

Ol 1978-jılı Moskvadaǵı ádebiyat institutın tamamlap, «Ámiwdárya» jurnalında proza boyınsha redaktor boldı. Házir Respublikalıq jas tamashagóyler teatrınıń ádebiy bólimin basqaradı.

G. Tursınova 1980-jıldan Jazıwshılar awqamınıń aǵzası.

Dóretiwshiligi

G. Tursınovanıń birinshi toplamı «Shuǵla» 1975-jılı basılıp shıqtı.

Onıń 1980-jılı «Minez», «Adamlar» atlı gúrrinler toplamları, 1990-jılı «Súlder» povesti, 1992-jılı «Músápir» atlı povestler jıynaǵı, balalarǵa arnalǵan «Ańızǵa tolı awılım» (2006) gúrriń hám povestler kitabı, orıs tilinde «Urok» (Sank-Peterburg, 2008) gúrrińler kitabı basılıp shıqtı.

G. Tursınovanıń dramaturgiya tarawında «Muxabbatım-ómirim» (2003) draması Tashkent qalasındaǵı dramalar boyınsha tańlawında jeńimpaz boldı hám teatr saxnalarında qoyıldı. «Sınaq» (2004) hám «Tentek maymıl» (2005) muzıkalı dramaları, «Qıyanet etpe dostıńa» (2008) draması Jas tamashagóyler teatrında qoyılsa, «Baxıtlı bolǵım keledi» video-filmi Qaraqalpaqstan telekanalınan kórsetildi.

Ol 2007-jılı «Qaraqalpaqstan Respublikasına miyneti sińgen mádeniyat xızmetkeri» degen ataqqa miyasar boldı.

Ádebiyatlar

• Қарақалпақстан Республикасы жазыўшылары (библиографиялык мағлыўмат) / нашрга тайёрловчи 3. Бекбергенова -T .: Extremum press , 2011. 240 бет. ISBN 978-9943-356-45-0