Hatam-Tay dástanı

«Hatam-Tay» dástanı — Buxara jırawshılıq mektebi wákilleri dóretiwshiligi arqalı tarqalǵan shıǵarmalar qatarına kieredi. Dástan Buxara qaraqalpaqları arasında «Hátem palwan» ataması menen belgili bolǵan. Buxaralı Qalmurat Qazaqbay ulına shákirt túsken Begmurat jıraw bul dostandı xalıq aldında jırlap kelgen. Dástan Qurbanbay jıraw Tájіbay ulınan M.Seyіtniyazov tárepinen 1956-jılı «Hatam-Tay» degen atamada jazıp alınǵan (R-286, №88204). Dástan «Qaraqalpaq folklorı» kóptomlıǵında (XVIII tom) 1988-jılı járiyalanǵan. Qurbanbay jıraw dástan mazmunın bayıtıp jırlawı arqalı Hatam palwan menen Tay qızdıń bir-birine súyіspenshiligin, wapadarlıǵın, óz maqsatine erisiw ushın barlıq qıyınshılıqlardı jeńip ótiwshi sheber súwretlep bergen. Dástan mifologiyalıq kórniselerge de bay.