Injigúl Saburova

Injigúl Saburova Jumabaevna
Injigúl Saburova Jumabaevna
Инжигүл Сабурова Жумабаевна
Tuwılǵan sánesi	5-iyul 1962-jılı
Tuwılǵan jeri	Kegeyli rayonı, Qaraqalpaqstan
Qaytıs bolǵan sánesi	1-may 2026-jılı (63 jasta)
Milleti	qaraqalpaq
Kásibi	sazende, baqsı, ilimpaz
Oqıǵan jeri	Ózbekstan mámleketlik mádeniyat hám kórkem óner institutı
Ómirlik joldas(lar)ı	Búrkit Piyazov
Perzentleri	Nurlıbek Piyazov (ulı) ; Jeńisbek Piyazov (ulı) ; Jánibek Piyazov (ulı) ; Aqılbek Piyazov (ulı)
Sıylıqları	«Qaraqalpaqstan Respublikasına miyneti sińgen mádeniyat xızmetkeri» (2014-jıl); II dárejeli «Salamat áwlad ushın» ordeni (2020-jıl 6-mart);

Injigúl Saburova Jumabaevna (Инжигүл Сабурова Жумабаевна; 1962-jıl 5-iyul — 2026-jıl 1-may) — qaraqalpaq sazendesi, baqsı, girjekshi hám pedagog. Ol «Qaraqalpaqstan Respublikasına miyneti sińgen mádeniyat xızmetkeri», Yunus Rajabiy atındaǵı Ózbek milliy muzıka kórkem óner institutınıń «Dástan atqarıwshılıǵı» kafedrası docenti bolıp islegen.

Ómirbayanı

Injigúl Saburova 1962-jılı 5-iyulda Kegeyli rayonında tuwılǵan. 1987-jılı Ózbekstan mámleketlik mádeniyat hám kórkem óner institutın tamamlaǵan.

Ol óziniń miynet jolın 1982-jılı Q. Ayımbetov atındaǵı Nókis mádeniyat texnikumında oqıtıwshı retinde basladı. Onıń kásiplik xızmet basqıshları tómendegishe boldı:

1984-jıl: Qaraqalpaqstan teleradiokompaniyasında sazende;
1999-jıl: Nókis mádeniyat hám kórkem óner kolledji muǵallimi;
2018-jıldan: Ózbekstan mámleketlik filarmoniyası Qaraqalpaqstan Respublikası bólimi «Muxalles» duwtarshılar ansambli baqsı-sazendesi bolıp islegen.

Keyinirek Yunus Rajabiy atındaǵı Ózbek milliy muzıka kórkem óner institutında docent lawazımında shákirtlerge sabaq berdi.

Dóretiwshilik xızmeti

I. Saburova qaraqalpaq hám ózbek milliy sazendelik kórkem ónerin xalıqaralıq dárejede tanıtıwǵa úlken úles qostı. Ol birneshe abıroylı festivallarda qatnastı:

1999-jılı «Alpamıs dástanınıń 1000 jıllıǵı» tańlawınıń diplomantı boldı;
1999–2001-jılları Samarqandtaǵı «Sharq taronalari» xalıqaralıq festivalında óner kórsetti;
2002–2005-jılları Franciya, Germaniya hám basqa da Evropa mámleketlerinde gastrol saparlarında bolıp, xalıq namaların atqardı;
2011-jılı Sankt-Peterburgta ótken «Interfolk» tańlawınıń jeńimpazı boldı.

Sonday-aq, ol 2018-jılǵı Xalıqaralıq maqam festivalı (Shahrisabz) hám 2019-jılǵı Xalıqaralıq baqsıshılıq festivalı (Termiz) qatnasıwshısı esaplanadı.

Sıylıqları

2014-jılı «Qaraqalpaqstan Respublikasına miyneti sińgen mádeniyat xızmetkeri» húrmetli ataǵı berildi.
II dárejeli «Salamat áwlad ushın» ordeni menen sıylıqlanǵan (2020-jıl 6-mart).

Derekler

Sırtqı siltemeler