Járdem:Maqala qalay jazıladı? (kirisiw)
Wikipedia-da maqala jazıp atırǵanıńızda, betlerdiń joqarǵı tárepinde kórinetuǵın «Redaktorlaw» túymesi eń jiyi qollanatuǵın tiykarǵı funkciyalardıń biri bolıp tabıladı. Qorǵalǵan betlerden basqa barlıq betlerde «Redaktorlaw» túymesi boladı. Bul túyme atınan belgili bolǵanınday, sol waqıtta oqıp atırǵan Wikipedia betiniń mazmunın redaktorlanatuǵın bir aynada sizge usınadı. Bettiń joqarǵı tárepinde «'Alma' beti redaktorlanıp atır» sıyaqlı jazıw payda boladı. Maqalalardı redaktorlawǵa imkaniyat beretuǵın texnikalıq dúzilislerge wikiler delinedi. Qáleseńiz «Redaktorlaw» túymesiniń qalay qollanılatuǵın test betinde sınap kórseńiz boladı. Test betine ózińiz qálegen bir-eki qatar jazıw jazıp, «Betti járiyalaw» túymesin basıń. Jazǵanlarıńızdı test betinde kóriw sizge unaydı dep úmit etemiz. Eskertip óteyiq, siz qosqan bul jazıw bir az waqıttan soń jańa paydalanıwshılarǵa orın bosatıw ushın bet kórinisinen tazalansa da, endi ol Wikipedianıń turaqlı bólegine aylandı. Wikipedia bar eken, bul jazıw da sistemanıń yadında ótken zamandaǵı bir ózgeris retinde saqlanıp qaladı. Test betinde úyrengenlerińizdi, eger olar paydalı ózgerisler bolsa, haqıyqıy maqalalarda qollanıwıńızǵa boladı.
Aldın ala kórip shıǵıw
Maqala jazıw dawamında eń kóp qollanatuǵın jáne bir funkciya bettiń tómengi tárepinde jaylasqan «Aldın ala kórip shıǵıw» túymesi menen isleydi. Test betine birneshe qatar qosıp, bul túymeni basıń. Ashılǵan bet siz islegen ózgerislerdi saqlamastan, aldın kóriwińizdi támiyinleydi. Hámmemiz qáte jiberemiz, bul funkciya járdeminde sol qátelerdi anıqlaw hám ońlaw imkaniyatıńız bar. Bul funkciya sistemanıń (maǵlıwmatlar bazası) kóp sanlı kishi dúzetiwlerdi saqlawınıń aldın alıwda úlken áhmiyetke iye. Eger bettiń eski nusqaların kórgińiz kelse, bettiń joqarǵı tárepindegi «Tariyxın kóriw» túymesinen paydalana alasız.
Ózgerislerdi kórsetiw
Eń sońında, siz jazǵanlarıńızdıń aldınǵı nusqa menen parqın kórsetetuǵın (alıp taslaǵanlarıńız shep tárepte, qosqanlarıńız oń tárepte) funkciyamız bar. Bul funkciyanı isletiw ushın «Saylanǵan nusqalardı kórsetiw» túymesinen paydalansańız boladı.
Sonday-aq, bir ózgeristi saqlamastan aldın «Redaktorlaw túsindirmesi» qutısına qısqasha túsindirme jazıwıńız sistemanı paydalanatuǵın basqa paydalanıwshılarǵa (hám ózińizge) júdá úlken járdem boladı. Juwmaq qutısına qısqasha «Qáteler dúzetildi» (orfografiyalıq, punktuaciyalıq hám t.b. qáteleri dúzetilgen bolsa) yamasa «Derek qosıldı» (bir maǵlıwmattıń deregi qosılǵan bolsa) dep jazıw jetkilikli. Ádette, qollanılatuǵın qısqartpalar ushın redaktorlaw túsindirmesi betine kóz juwırtıwıńızdı usınıs etemiz.
UMÍTPAŃ! Ózgerislerińizdi kózden ótkergennen keyin «Ózgerislerdi járiyalaw» túymesin basıwdı umıtpań, keri jaǵdayda ózgerislerińiz joǵalıp ketiwi múmkin. Ózgerislerińizdi saqlamastan redaktorlaw betin jawıp atırǵanda yamasa basqa betke ótpekshi bolǵanda, ózgerislerdi saqlaw boyınsha eskertiw xabarı kórsetiledi. Bul eskertiw xabarı eger dizimnen ótken paydalanıwshı bolsańız, óz sazlawlarıńızdandan ózgertiwińizge boladı.