Jańabay Shılmanov
| Jańabay Shılmanov | |
|---|---|
Jańabay Palımovich Shılmanov | |
| Qaraqalpaqstan Respublikası Ishki isler ministri | |
|
Wákillik dáwiri 1991-jıl — 2002-jıl | |
| Jeke maǵlıwmatları | |
| Tuwılǵan sáne | 16-noyabr 1940-jılı |
| Tuwılǵan jeri | Kegeyli rayonı, Qaraqalpaqstan |
| Qaytıs bolǵan sáne | 7-fevral 2026-jılı (85 jasta) |
| Qaytıs bolǵan jeri | Nókis, Qaraqalpaqstan |
| Puqaralıǵı | Ózbekstan |
| Ómirlik joldası | Klara |
| Balaları | 4 |
| Ákesi | Palımbet |
| Sıylıqları | II dárejeli «Dańq» ordeni Qaraqalpaqstan Respublikasına miyneti sińgen yurist |
Jańabay Palımovich Shılmanov (Жаңабай Шылманов; 1940-jıl 16-noyabr — 2026-jıl 7-fevral) — qaraqalpaqstanlı mámleketlik isker, general-mayor. Ol 1991-2002-jıllar aralıǵında Qaraqalpaqstan Respublikası Ishki isler ministri lawazımında xızmet etti.
Biografiyası
[redaktorlaw | derekti redaktorlaw]Jańabay Shılmanov 1940-jılı 16-noyabr kúni Qaraqalpaqstan Respublikasınıń Kegeyli rayonında dúnyaǵa kelgen. 1957-jılı rayon orayındaǵı orta mektepti pitkerip, 1957-1962-jılları Tashkent mámleketlik pedagogikalıq institutınıń inglis filologiyası fakultetinde oqıǵan hám ol jerdi jeńillikli diplom menen pitkergen.
Miynet jolın 1962-1965-jılları Tınısh okeanı áskeriy-teńiz flotı qatarında instruktor sıpatında baslaǵan. Keyin ala Kegeyli rayonındaǵı orta mektepte muǵallim, rayonlıq jaslar keńesi baslıǵı lawazımlarında xızmet etken.
1966-jılı Mámleketlik qáwipsizlik komiteti (MQK) qatarına qabıllanıp, Minsk qalasındaǵı arnawlı mektepti pitkergen. 1980-1981-jılları «Kaskad-2» arnawlı toparı quramında Awǵanstanda jawıngerlik xızmet wazıypaların orınlaǵan.
Keyin ala Ózbekstan Respublikası Mámleketlik qáwipsizlik komitetinde bólim baslıǵı, Qaraqalpaqstan Respublikası Mámleketlik qáwipsizlik komiteti baslıǵınıń orınbasarı lawazımlarında isledi. 1983-1987-jılları Qaraqalpaqstan Respublikası partiya komitetiniń Hákimshilik bólimi baslıǵı boldı.
Siyasiy iskerligi
[redaktorlaw | derekti redaktorlaw]1987-jıldan Qaraqalpaqstan Respublikası Ishki isler ministriniń orınbasarı, 1991-2002-jılları Qaraqalpaqstan Respublikası Ishki isler ministri lawazımında xızmet etip, sistemanıń rawajlanıwı hám jámiyetlik qáwipsizlikti támiyinlewge salmaqlı úles qosqan.
2002-jıldan húrmetli demalısqa shıqqannan keyin, Qaraqalpaqstan Respublikası Joqarǵı Keńesinde komitet baslıǵı, sonday-aq, Konstituciyalıq baqlaw komitetiniń baslıǵı lawazımlarında uzaq jıllar dawamında jumıs alıp bardı.
Sıylıqları
[redaktorlaw | derekti redaktorlaw]Pidayılıq penen etken xızmetleri ushın Jańabay Shılmanov tómendegi ataq hám ordenler menen sıylıqlanǵan:
- II dárejeli «Dańq» ordeni;
- «Qaraqalpaqstan Respublikasına miyneti sińgen yurist» húrmetli ataǵı;
- «Ishki isler general-mayorı» joqarı áskeriy sheni.
Qaytıs bolıwı
[redaktorlaw | derekti redaktorlaw]Jańabay Shılmanov 2026-jılı 7-fevralda 85 jasında dúnyadan kóz jumdı.