Jetkinshek
“Jetkinshek” – Qaraqalpaqstan Respublikası balalar hám jas óspirimler gazetası.
Tariyxı
[redaktorlaw | derekti redaktorlaw]“Jetkinshek” gazetası 1932-jıldıń 20-yanvarınan baslap 1550 nusqada eski latın grafikasında ayına úsh márte shıǵarılıp basladı. Gazetanıń birinshi redaktorı – Maqsud Yakubov. 1933-jılı basılım ayına bes márte, 5000 nusqada basılıp shıǵa basladı, sol waqıttaǵı redaktor shayır Nawrız Japaqov edi. Ekinshi jer júzilik urısqa deyin “Jetkinshek”ke Xojamurat Tájimuratov, Ismayıl Sultanov, Sapar Qurbanovlar redaktorlıq etti. Urıs jıllarında gazeta úziliske tústi hám 1958-jılı 1-yanvardan baslap 10000 nusqada oqıwshılarǵa inam etildi. Bunnan keyingi jıllarda gazetaǵa Ádenbay Tájimuratov, Perida Ábdiramanova, Perdegúl Edenbaeva, Ábdimurat Atajanov hÁm Gúlnara Nurlepesovalar redaktorlıq etip, basılımnıń tirajı 1972-jılda óz tarıyxındaǵı rekord kórsetkish 39200 nusqaǵa jetedi.
Tájiriybe mektebi
[redaktorlaw | derekti redaktorlaw]“Jetkinshek” gazetası óziniń 90 jıllıq tariyxı dawamında qaraqalpaq ádebiyatı hám jurnalistikasına talantlı kadrlardı tayarlap beriwshi tájiriybe mektebi boldı. Bul gazetada ózleriniń dóretiwshilik jolın baslaǵan insanlar arasınan belgili ilim ǵayratkerleri, jazıwshı-shayırlar hám qálemi ótkir jurnalist qánigeler jetilisip shıqtı. Olardan Marat Qarabaev, Saǵıydulla Abbazov, Klim Nazbergenov, Xalmurat Saparov, Ábdimurat Atajanov, Muratbay Nızanov, Gúlaysha Esemuratova, Keńesbay Kárimov, Orazbay Ábdiraxmanov, Jiyenbay Izbasqanov, Ómirbay Ótewliev, Alpısbay Sultanov, Yaqıpbay Ájimov, Saylawbay Jumaǵulovlar Qaraqalpaq ádebiyatı hám jurnalistikasınıń iri tulǵaları qatarında tilge alınadı.
Ǵárezsizlik jıllarında
[redaktorlaw | derekti redaktorlaw]Gazetaǵa 2000-jıldan baslap belgili shayır hám jurnalist Gúlnara Nurlepesova basshılıq etip, bul dáwirde gazeta mazmun hám sapa jaǵınan jáne de bayıdı. 2004-jılı basılımnıń kólemi A-3 formatında 8 bet bolıp keńeytildi. 2005-jılı bolsa erterekte gazeta janınan “Dilwar” atı menen ashılǵan klub, usı at penen jas xabarshılar dógeregi bolıp qayta dúzildi.