Marakana stadionı

Marakana stadionı — Braziliyanın Rio-de-Janeyro qalasında jaylasqan stadion.

Tariyxı

Braziliya 1950-jılı futbol boyınsha jáhán chempionatına múnásip qabıl etilgeninen keyin turnir ushın jańa stadion qurıwǵa qarar qabıl etit. Stadionnıń rejeleri Rafael Galvao hám Pedro Paulo Bernardes Bastos atlı eki injener tárepinen sızılǵan. Onıń tırnaǵı 1948-jıl 2-avgustta qoyılǵan. 1950-jıl 16-iyunde ótkerilgen ashılıw oyınında ol «Rio-de-Janeyro Juldızları» hám «San-Paulu Juldızları» komandaları menen ushırastı. Ol ushırasıwda «Rio-de-Janeyro juldızları» 3:1 esabında jeńiske eristi. Didi stadionda gol urǵan birinshi futbolshı boldı^[1]. Stadionda ótkerilgen futbol boyınsha jáhán chempionatınıń final oyının 1950-jılı Urugvay Braziliyadan 2:1 esabında jeńip shıqqanında 199 854 adam tamasha etken hám futbol tariyxındaǵı tamashagóyler rekordı jańalanǵan^[1]^[2].

Stadion 1965-jılı, oǵan tiykar salınǵanınan 17 jıl ótkennen soń qurıp pitkerildi. 1966-jılı Braziliyada júdá jaqsı kórilgen sportshı Mario Filonıń qaytıs bolıwınan keyin stadion basshıları stadionǵa Filonıń atın beriwge qarar etti.

Rásmiy túrde 180 mıń adamǵa mólsherlengen stadionǵa iri oyınlarda 200 mıń adamdı qabıl etiw múmkin. Ligadaǵı tamashagóyler rekordı bolsa 1963-jıldıń avgust ayında «Flamengo» — «Fluminense» oyınında 177 mıń 656 tamashagóy menen jaratıldı. Stadionnıń quwatlılıǵı keyingi jılları FIFA standartları tiykarında 95 mıńǵa qısqartılıp, onıń ońlanıwı ushın naq 90 million dollar qarjı jumsalǵan.