Meńliqal dástanı

«Meńliqal» dástanı — xalıq jırawı Qurbanbay Tájibaevtiń repertuarınan orın alǵan. Onı shayır Máten Seytniyazov 1956-jılı jazıp alıp, ÓzR IA QB fundamental kitapxanasınıń qoljazbalar fondına tapsırǵan (P-288, 88203). Kólemi 1600 qatar qosıq hám qara sózlerden ibarat. Dástan 1956-jılı «Qaraqalpaq ádebiyatı hám iskusstvosı» («Ámiwdárya») jurnalında járiyalanǵan. Keyin usı variant 1988-jılı qaraqalpaq folklorı kóp tomlıǵınıń XXIII tomına engizilgen. Tematikalıq jaqtan turmıslıq dástanlar qatarınan orın aladı. Ádalatsızlıqqa, teńsizlikke qarsı gúres ideyası ápiwayı puqaralardıń aldındaǵı qıyınshılıqları jeńiwi ushın umtılǵan háreketleri menen bayan etiledi. Dástan kórkemlik jaqtan da ádewir jetiskenliklerge iye. Onda xalıqlıq dóretiwshilik usıllar, orınlı aytılǵan ushırma sózler, naqıl-maqallar sheber paydalanıladı.