Miynetke baylanıslı qosıqlar

Qaraqalpaq xalıq qosıqlarınıń belgili bir bólimin miynetke baylanıslı qosıqlar quraydı. Bul qosıqlardı miynet quralları, miynettiń túrin, egin egiw, jer súriw, jer suwǵarıw, oraq orıw, qos aydaw, mal baǵıw, arba aydaw h.t.b. haqqında sóz etiledi. Miynetke baylanıslı qosıqlarda miynettiń túrin sóz etiw menen olarǵa ıshqı sezimleride aralastırıladı. Bul qosıqlar tek qurı miynet haqqında bolıp ómiriniń basqa táshwishleri aralastırılmaǵanda bul qosıqlardıń qızıǵı da bolmaǵan bolar edi. Muxabbat sezimleri hámmeniń dıqqatın ózine awdaratuǵın otlı sezimler. Sonlıqtan miynetti sóz etiw menen birge muxabbat tuyǵıları menen baylanıstırılıp keledi. Bunday qosıqlarǵa xalıqqa keńnen tanılǵan mına qatarlardı keltiriwge boladı:

Arba aydasam altaqtaǵa minemen,
Bir pul tapsam belbewime túyermen,
Arqası Dawqara qublası Shıǵıs,
Eki ortada qos aydadım bir tınbay...

Júweri ektim kendir menen aralas,
Bir yar tuttım orta boylı qálem qas,
Jurt aytadı onıń yarı qara dep
Qara bolsa hám hinji marjan aralas.