Muǵallimge raxmet
| Muǵallimge raxmet | |
|---|---|
 | |
| Avtorı | Tólepbergen Qayıpbergenov |
| Janr | proza, povest |
| Mámleket |  Qaraqalpaqstan |
| Kitap jazılǵan til | qaraqalpaq tili |
| Original baspa jılı | 1959 |
| Sıylıqları | Hamza atındaǵı Ózbekstan SSR mámleketlik sıylıǵı (1971) |
Muǵallimge raxmet (Муғаллимге рахмет) — Tólepbergen Qayıpbergenovtıń 1958-jılı «Jetkinshek» gazetasında járiyalanıp, 1959-jılı QQMB tárepinen óz aldına kitap bolıp basılıp shıqqan ekinshi povesti. Jazıwshı bul shıǵarması ushın 1971-jılı Hamza atındaǵı Ózbekstan SSR mámleketlik sıylıǵınıń laureatı boldı.
Mazmunı
[redaktorlaw | derekti redaktorlaw]Bilimlendiriw máselesine baǵıshlanıp jazılǵan shıǵarmada, tiykarınan, Qaraqalpaqstanda jańa oqıtıw usılındaǵı keńes mektepleriniń payda bolıwı, sol mektepti dúziwdegi júz bergen qıyınshılıqlar, bul qıyınshılıqlardı jeńip, xalıqtı ǵalaba sawatlandırıwdaǵı dáslepki muǵallimlerdiń alıp barǵan gúresleri waqıyaları súwretleniw tabadı. Avtor povestte usı xalıqtı sawatlandırıw jónelisindegi dáslepki muǵallimlerdiń atqarǵan xızmetleri menen tutqan ornın súwretlew arqalı ustaz degen attı ulıǵlaw menen birge, XX ásirdiń 20—30-jıllarındaǵı qaraqalpaq xalqınıń sawatlılıqqa umtılıwdaǵı qıyın hám dańqlı jolların ashıp kórsetiwdi bas maqset tutqan.
Povesttegi bul ideya dáslepki muǵallim Meńlimurat hám onıń bilim alıwǵa háwes, zeyinli, shaqqan Turdımurat sıyaqlı haq kókirek shákirtleriniń obrazın jasaw arqalı isenimli hám oǵada kórkem etip ashıp berilgen[1].
Awdarmaları
[redaktorlaw | derekti redaktorlaw]Povest ózbek (1962, 1978), rus (1966, 1978, 1979), moldavan (1981), qazaq (1983) tillerine awdarılıp, óz aldına kitap halında basılıp shıqtı.
2020-jılı Tashkent mámleketlik agrar universiteti «Tiller» kafedrası inglis tili oqıtıwshıları tárepinen povest inglis tiline awdarıldı hám dáslepki 100 nusqası basıldı[2].
Derekler
[redaktorlaw | derekti redaktorlaw]- ↑ Allambergenov, Keńesbay; Orazımbetov, Quwanıshbay; Bekbergenova, Mariya; Bekbergenova, Ziyada. Ádebiyat. 11-klasslar ushın, 2018.
- ↑ «Oʻzbekiston Qahramoni Toʻlepbergen Qayipbergenov qalamiga mansub «Rahmat muallim» qissasi ingliz tiliga tarjima qilindi». TDAU rásmiy telegram kanalı (4-iyul 2020-jıl).
Sırtqı siltemeler
[redaktorlaw | derekti redaktorlaw]
| |||||||||||||||||||||||
