Oyınshı joldası
Oyınshı joldası (sonday-aq match tumarı yamasa bala tumarı dep te ataladı) — futbolshı menen birge maydanǵa shıǵatuǵın bala. Oyınshı joldasları maydanǵa kirgende futbolshı menen qol uslasıp júredi hám milliy gimn orınlanǵan waqıtta oyınshı menen birge turadı. Balalar ádette 6 jastan 18 jasqa shekem boladı. Oyınshılarǵa járdem beriwden tısqarı, olar kóbinese bayraqlardı kóteriw, shetki sızıqtaǵı top xızmetkerlerine járdem beriw hám bir-biri menen matchlar oynaw sıyaqlı wazıypalardı atqaradı. Degen menen búgingi kúnde oyınshılardıń balalar menen shıǵıwınıń hár qıylı sebepleri bar. Olarǵa balalar huqıqların qorǵaw kampaniyaların úgit-násiyatlaw, oyınǵa páklik elementin qosıw, balalardıń ármanların orınlaw yamasa bunnan payda tabıw hám oyınshılarǵa balalardıń olarǵa qarap órnek alıp atırǵanın esletiw kiredi. Ol sonday-aq tártipsizlik yamasa basqa zorlıq-zombılıq túrleriniń aldın aladı, sebebi ıqlasbentler oyınshılar balalar menen birge bolsa, olarǵa bir nárse ılaqtırıw itimalı azıraq boladı[1].
Tariyxı
Bul dástúr 1970-jıllarda Braziliyada payda bolǵan. Ideya sol waqıtta «Klub Atletiko Mineyro» klubınıń jámiyetshilik penen baylanıslar direktorı bolǵan Ronan Ramos Oliveyradan kelip shıqqan. 1976-jıldıń 5-sentyabrinde Atletiko Mineyro menen Amerika Mineyro klubları arasındaǵı matchta, ol balalardıń komanda oyınshıları menen maydanǵa shıǵıwın usınǵan. Bul jerde qızıqlı tárepi sol, dáslebinde tańlanǵan balalar oyınshıǵa uqsas bolıwı kerek edi. Bul háreket jáne de kóbirek shańaraqlardıń oyınlarǵa kele baslawı ushın strategiya bolǵan.
UEFA Euro 2000 oyınshı joldaslarınıń hárbir futbolshı menen birge payda bolǵan dáslepki iri ilajlarınıń biri boldı, bul komanda oyınshılarınıń bir-biri menen qol uslap shıǵıw tájiriybesin almastırdı. Klub oyınlarında balalar ádette jaslar komandalarınıń aǵzaları yamasa tańlaw jeńimpazları boladı[2]. 2002-jıldan berli, Jáhán Kubogı yamasa Evropa Chempionatı joldasları ilajdıń qáwenderi bolǵan McDonald's hám Lidl (UEFA EURO 2024 ushın) shólkemlestirgen tańlawda tańlanadı[3][4].
Bala tumarı bolıw pullı da, biypul da bolıwı múmkin. FA Premer-liga klubları arasında, ayırımları matchqa baylanıslı 350-600 funt sterling talap etiwi múmkin, al basqaları tańlawlar hám qayırqomlıq shólkemleri arqalı ayırım orınlardı biypul usınadı, al basqa klublar ulıwma haqı talap etpeydi[5].
Ayırım jaǵdaylarda, arnawlı joldaslar bolıwı múmkin. Mısalı, Ayaks oyınshıları Analar kúninde anaları menen shıqqan[6] hám San-Paulu FC oyınshıları San-Paulodaǵı qańǵıbas iytlerdi asırap alıwdı úgit-násiyatlaw ushın iytler menen shıqqan[7]. Ueyn Runi sıyaqlı ayırım ataqlı oyınshılar balalıǵında oyınshı joldası bolǵan[8].
Derekler
- ↑ Ivan Anich. «Why Do Soccer Players Walk Out With Kids?». The18 (7-oktyabr 2015-jıl). 12-avgust 2020-jılda túp nusqadan arxivlendi. Qaraldı: 7-iyun 2025-jıl.
- ↑ Felicia Clow. «Why Do Football Players Walk Out With Children?». whoareyadesigns (21-sentyabr 2015-jıl). 18-may 2016-jılda túp nusqadan arxivlendi.
- ↑ «The McDonald's Player Escort Programme». FIFA. 22-iyun 2016-jılda túp nusqadan arxivlendi.
- ↑ «McDonald's Launches Search for UEFA EURO 2016™ Player Escorts». McDonald's (29-fevral 2016-jıl). 4-iyul 2018-jılda túp nusqadan arxivlendi. Qaraldı: 11-iyul 2016-jıl.
- ↑ Riach. «Revealed: Premier League clubs charge up to £600 for children to be mascots». The Guardian (18-dekabr 2014-jıl). 4-sentyabr 2021-jılda túp nusqadan arxivlendi. Qaraldı: 16-iyul 2018-jıl.
- ↑ Dan Quarrell. «Ajax players walk out with their mums on Mother's Day». Eurosport (10-may 2015-jıl).
- ↑ Will Magee. «Sao Paulo players accompanied onto pitch by very odd mascots ahead of Palmeiras match». The Mirror (30-sentyabr 2015-jıl). 4-sentyabr 2021-jılda túp nusqadan arxivlendi. Qaraldı: 4-aprel 2018-jıl.
- ↑ Lorna Hughes. «Revealed: The other mascot with Wayne Rooney at 1996 Merseyside Derby». Liverpool Echo (10-sentyabr 2015-jıl). 7-iyun 2025-jılda túp nusqadan arxivlendi. Qaraldı: 7-iyun 2025-jıl.