Qıpshaqbay Mátmuratov

Qıpshaqbay Mátmuratov
Tuwılǵan sánesi	3-mart 1947-jılı(1947-03-03) (78 jasta)
Tuwılǵan jeri	Shımbay rayonı
Dóretiwshilik túri	proza  • poeziya  • dramaturgiya
Oqıǵan jeri	Muxtar Ashrafiy atındaǵı Tashkent mámleketlik konservatoriyası Qaraqalpaq mámleketlik universiteti
Ataqları	«Qaraqalpaqstan Respublikasına xızmet kórsetken kórkem óner ǵayratkeri»

Qıpshaqbay Mátmuratov (Қыпшақбай Мәтмуратов; 1947-jıl 3-mart, Shımbay rayonı) — qaraqalpaq jazıwshısı. Qaraqalpaqstan Jazıwshılar awqamı aǵzası (2016). «Qaraqalpaqstan Respublikasına xızmet kórsetken kórkem óner ǵayratkeri».

Ómir hám miynet jolı

1947-jılı 3-martta Shımbay rayonında tuwılǵan. 1961-jılı orta mektepti, Nókis mámleketlik muzıka uchilishesiniń skripka bólimin 1965-jılı tamamlap, Muxtar Ashrafiy atındaǵı Tashkent mámleketlik konservatoriyasında 1969-jılǵa deyin oqıydı. Berdaq atındaǵı sazlı teatrda, Nókis mádeniy aǵartıw texnikumında, muzıka mektebinde, peduchilishide muǵallim bolıp islegen. 1977-jılı Qaraqalpaq mámleketlik universitetiniń filologiya fakultetin tamamladı. 1982-jıldan baslap Qaraqalpaqstan televideniesinde bólim baslıǵı lawazımında islegen.

2016-jıldan Jazıwshılar Awqamı aǵzası.

Dóretiwshiligi

Onıń dóretiwshilik xızmeti muzıka uchilishesinde oqıp júrgen gezlerinde baslanadı. Shayırlardıń qosıqlarına nama jazdı. 1970-jıldan baslap «Ámiwdarya» jurnalında gúrrińleri shıǵa basladı. 1980-jılı «Japıraqlar» atlı gúrrińler toplamı shıqtı. Sol jılı Berdaq atındaǵı teatrda «Bir úyde eki ómir» draması saxnalastırıldı. Sońınan «Qutlı jol» (inscenirovka 1985), «Ómirbek hám Tazsha» (komediya 1988), «Bes kúnlik dúnya» (drama 1990), «Yalǵanshınıń isi» (1991), «Sháryar» (drama 1992), «Aq Tekesh penen kók Tekesh» (Quwırshaq teatrı 1995), «Ákeli jetimler» (drama 1998), «Keshikken muhabbat» (drama 2003), «Kempirge talas» (komediya 2005), «Berdaq» (muzıkalı drama 2016) dramaları saxnalastırıldı. «Ómirbek hám Tazsha» hám «Bes kúnlik dúnya» shıǵarmaları Qaraqalpaqstannan tısqarı Ózbekstan, Qazaqstan hám Qırǵızstan teatrlarında saxnaǵa qoyıldı. 2004-jılı «Terbenbes» atlı tariyxıy romanı basılıp shıqtı.

Jetiskenlikleri

Jazıwshı Qaraqalpaqstan Respublikası Joqarǵı Keńesiniń «Húrmet jarlıǵı», «Qaraqalpaqstan Respublikasına xızmet kórsetken kórkem óner ǵayratkeri» húrmetli ataǵı menen sıylıqlandı.