Qırmandáli dástanı

«Qırmandáli» dástanı — 1961-jılı xojelishi baqsı Bekmurat Jumaniyazovtan ilimiy xızmetker Ó. Erpolatov tárepinen jazıp alınǵan (R-93, №40721). Usı variant tiykarında tayarlanǵan kitapsha 1963-jılı «Qaraqalpaqstan» baspasında basılıp shıqtı. Dástan ekinshi ret qaraqalpaq folklorı kóp tomlıǵınıń XV-tomında 1986-jılı jarıyalandı. Dástanıń bas qaharmanı Qırmandáli hayal-qızlar obrazı epikalıq ideyalastırılǵan ózgeshelikleri menen ajıralıp turadı. Qırmandáli aqıllı, sulıw, shayır, sózge sheshen, pázende bolıwı menen sheklenbey, naǵız palwan, batır qız sıpatında da kórinedi. Qız sázendeshilik-aytıs ónerinde de, gúresip kúsh sınasıw jarıslarında da aldına adam salmaytuǵın jeńilmes qaharman obraz dárejesinde sáwlelenip, qaraqalpaq xalqınıń hayal-qızlar haqqındaǵı túsinikleriniń jemisli nátiyjelerin sáwlelendiredi.