Quda túsiw

Qudalar eki-úsh jası úlken bolıp, quda tusiwi ushın qızdıń úyine keledi. Bunnan aldın ala xabar tarqap qızdıń ata-anası da ózleriniń bir-eki jası úlkenin aldırıp qoyadı.

Qudalarǵa arnayı qazan keterip, kutedi. Eki táreptiń jası úlkenleri qudasha haqqında sóylesedi. Tamır jańalawǵa kelisilgennen keyin nan sındırısadı. Bir-birine oń bolsın aytadı. Nan sındırısıw eki táreptiń esabınan putin jup nan qolga alınıp, dáslep, qızdı sorap kelgen qudalarǵa usınıs etiledi. Olar jası úlkeninen baslap, gezek penen jup-juptan nan qosa sındırıp awız tiygennen keyin, nan qız tàreptegi qudalarǵa usınıladı.

Usılay etip, eki jasqa baxıt tilep, pátiya qıladı, qızdıń uzatılatuǵın sárshembisi belgilenedi. Burında «sárshembi— sátli kún» dep qız uzatıw tek ǵana sárshembi kúnine belgilengen.