Sársenbay Seytnazarov

Sársenbay Seytnazarov Erjanovich
Tuwılǵan sánesi	1-aprel 1961-jılı(1961-04-01) (64 jasta)
Tuwılǵan jeri	Taxtakópir rayonı, Qaraqalpaqstan ASSR
Puqaralıǵı	Ózbekstan
Kásibi	fermer
Qostarı	Perdexan Esimbetova
Perzentleri	3
Ataqları

Sársenbay Seytnazarov Erjanovich (1961-jıl 1-aprel, Taxtakópir rayonı, Qaraqalpaqstan ASSR) — qaraqalpaqstanlı fermer, burınǵı senator, «Ózbekstan Qaharmanı» (2011).

Miynet iskerligi

Miynet jolın 1981-jılı Taxtakópir rayonındaǵı 27-mexanizaciyalasqan kolonnada jumısshı sıpatında baslaǵan. Bul jerde 1983—1985-jıllar dawamında qurılıs boyınsha master wazıypasın atqarǵan. 1985-jıldan bolsa «Maqpalkól» atlı jaslar salıgershilik brigadasın basqaradı. Brigada onıń basshılıǵnda bir qatar jeńislerge erisedi.

2000-jılı 647 gektar maydanda óziniń «Tayımbet» atlı fermer xojalıǵın shólkemlestirgen. Bul jerde tiykarınan paxta, sonday-aq, gúnji, júweri jetistirilgen. 2004—2005-jıllarda salıgershilik, 2006-jıldan salınıń suwlı jerinde bolsa balıqshılıq penen de shuǵıllanǵan.

2007-jılǵı «Baslama-2007» tańlawında Sársenbay Setnazarov «Eń jaqsı fermer» nominaciyasında jeńimpazlıqtı qolga kirgizip, «Matiz» avtomobiline iye bolǵan. Sonday-aq, fermer bir qatar qayırqomlıq islerine de úles qosqan. Taxtakópir rayonındaǵı kópir, mektepler ońlanıwında hám xalıqtı materiallıq qollap-quwatlaw jumıslarına basshılıq etken.

2011-jılı «Ózbekstan Qaharmanı» ataǵı menen sıylıqlanǵan, sonday-aq, sol jılı Ózbekstan Respublikası Oliy májlisine senator etip tayınlanǵan.

2013-jıldan Qaraqalpaqstan fermerler keńesi baslıǵı.

Shańaraǵı

Úylengen, bir qız, eki ulı bar. Ómirlik joldası — Perdexan Esimbetova. Qızı Nargiza Tashkent mámleketlik pediatriya institutınıń Nókis filialın pitkerip, Nókis mámleketlik pediatriya birlespesinde shıpaker bolıp isleydi. Úlken ulı — Yusup Qaraqalpaq mámleketlik universitetin tamamlaǵan, kishi ulı bolsa Pekindegi kolledjde turizm qánigeligi boyınsha bilim alǵan.

Sıylıqları

2007-jıl — «Baslama-2007» tańlawında «Eń jaqsı fermer» nominaciyası jeńimpazı, «Matiz» avtomobili iyesi;

2011-jıl 23-avgust — Ózbekstan ǵárezsizligin bekkemlew, onıń dúnya kólemindegi abırayın joqarılatıw, reformalardı jáne de tereńlestiriw baǵdarında mámleket hám xalıq aldındaǵı úlken xızmetleri, óndiris tarawındaǵı uzaq jıllıq pidayı miyneti jáne jas áwladtı watansúyiwshilik hám xalıqshıllıq ruwxında tárbiyalawǵa qosqan úlken úlesi ushın — «Ózbekstan Qaharmanı» ataǵı — «Altın juldız» medalı menen sıylıqlanǵan.