Saylawbay Jumaǵulov
| Saylawbay Jumaǵulov | |
|---|---|
| Tuwılǵan sánesi | 27-yanvar 1951-jılı (74 jasta) |
| Tuwılǵan jeri | Taxtakópir rayonı |
| Dóretiwshilik túri | proza, dramaturgiya |
| Oqıǵan jeri | T. Shevchenko atındaǵı Nókis mámleketlik universiteti |
| Sıylıqları | Qaraqalpaqstan Jazıwshılar awqamınıń sıylıǵı |
Saylawbay Jumaǵulov (1951-jıl 27-yanvar) — yumorist jazıwshı hám dramaturg.
Ómir hám miynet jolı
[redaktorlaw | derekti redaktorlaw]S.Jumaǵulov 1951-jılı 27-yanvarda Taxtakópir rayonında tuwıladı. 1968-jılı Nókis qalasındaǵı Berdaq atındaǵı orta mektepti tamamlaydı.
Miynet jolın Nókis konserva zavodında jay jumısshı bolıp islewden baslaydı. 1970-1972-jılları áskeriy xızmette boladı. 1976-1980-jılları T. Shevchenko atındaǵı Nókis mámleketlik universitetiniń qaraqalpaq tili hám ádebiyatı fakultetin sırttan oqıp pitkeredi.
S. Jumaǵulov óziniń dóretiwshilik islerin mektepte «Jetkinshek» gazetasına «Kishkeneler sóyleydi» degen at penen qısqa yumorlar jazıwdan baslaydı. Son «Celinnik Karakalpakii», «Jetkinshek», «Erkin Qaraqalpaqstan» gazetalarında, «Ámiwdárya», «Aral qızları» jurnallarında juwaplı orınlarda xızmet etedi. Házirgi waqıtta Qaraqalpaqstan Respublikası Teleradiokompaniyasında redaktorlıq lawazımında islep kiyatır.
Ol 1993-jıldan Jazıwshılar awqamınıń aǵzası.
Dóretiwshiligi
[redaktorlaw | derekti redaktorlaw]S. Jumaǵulov «Sırım da usı, shınım da ...» (1984), «Tufliydiń náli» (1990), «Balalıǵımnan bir eles» (1991), "Qırıq jıldan sońǵı bir kún» (1992), «Meniń hayalım jazıwshı» (1992), «Bilettiń jartısı kimde?», (1995), «Adamlar qalay buzılǵan?» (1997) atlı yumorlıq povest hám gúrrińler toplamlarınıń avtorı.
«Tekin tarvuz» atlı ózbek tilindegi kitabı (M.Nızanov penen birgelikte) Tashkent qalasında basılıp shıqtı.
Dramaturgiyası
[redaktorlaw | derekti redaktorlaw]S. Jumaǵulovtıń dramaturgiya janrında «Kúyewindi berip tur», «Еkstrasens», «Bultlı kúnler», «Ǵarrı qızdıń baxtı», «Sabır túbi, sarı altın», «Ana qábirin izlegen jigit», «Qara shayan», «Ótirik jinli» atlı pyesaları Qaraqalpaqstan, Ózbekstan, Túrkmenistan hám Qırǵızstan teatrlarında qoyılıp kelmekte. «Еkstra sens» pyesası ushın Qaraqalpaqstan Jazıwshılar awqamınıń sıylıǵınıń laureatı boldı.
Ádebiyatlar
[redaktorlaw | derekti redaktorlaw]- Қарақалпақстан Республикасы жазыўшылары (библиографиялык мағлыўмат) / нашрга тайёрловчи 3. Бекбергенова -T .: Extremum press , 2011. 240 бет. ISBN 978-9943-356-45-0