Shaxı mutlaq dástanı

«Shaxı mutlaq» dástanı — qıssaxanlıq jolı menen tarqalıp kelgen dóretpelerden biri bolıp, onı ataqlı Juman baqsınıń balası Jańabay Jumanov 1962-jılı jazıp tapsırǵan (R-338, No109493). Burın járiyalanbaǵan. «Shaxı mutlaq» ataması «Biykarlanǵan patsha» degen mánisti ańlatadı. Povesttiń xalıq awızındaǵı basqa atları — «Bádbaq patsha», «Aqmaq patsha». «Shaxı mutlaq» ataması menen usı baspaǵa jiberilip atırǵan bul dástanda óz qızına ashıq bolıp, shermende halatına túsken taxt iyesiniń ersi is-háreketleri, xalıqtıń úrp-ádetine jat bolǵan minez-qulqları biykarlanadı. Dástan júwmaǵında táǵdirdiń awırmanlıǵın kóp kórgen japakesh insanlardıń sabırlılıǵı arqalı óz maqset-muratına jetetuǵını turmıslıq mısallar tiykarında ashıp berilgen.