Sitemaps
Sitemaps — bul veb-masterdiń veb-saytta veb-skanerlew ushın qoljetimli URLler haqqında izlew sistemaların xabardar etiwine arnalǵan XML formatındaǵı protokol. Ol veb-masterlerge hár bir URL haqqında qosımsha informaciya kirgiziwge imkaniyat beredi: ol sońǵı ret qashan jańartıldı, qanshelli jiyi ózgeredi hám sayttıń basqa URLlerine salıstırǵanda qanshelli áhmiyetli. Bul izlew sistemalarına sayttı nátiyjelirek skanerlewge hám sayttıń qalǵan mazmunınan izolyaciyalanǵan URLlerdi tabıwǵa imkaniyat beredi. Sitemaps protokolı URL kirgiziw protokolı bolıp, URL shıǵarıp taslaw protokolı bolǵan robots.txt-ti tolıqtıradı.
Tariyxı
Google dáslep Sitemaps 0.84-ti 2005-jıl iyun ayında veb-baǵdarlamashılar óz saytları boyınsha siltemeler dizimin járiyalawı ushın engizdi[1]. Google, Yahoo! hám Microsoft 2006-jıl noyabrde Sitemaps protokolın birgelikte qollap-quwatlaytuǵının járiyaladı[2]. Sxema versiyası «Sitemap 0.90» ǵa ózgertildi, biraq basqa ózgerisler engizilmedi.
2007-jıl aprelde Ask.com hám IBM Sitemaps-tı qollap-quwatlaytuǵının járiyaladı[3]. Sonday-aq, Google, Yahoo, MSN robots.txt arqalı sayt kartaların avtomat túrde tabıwdı járiyaladı. 2007-jıl mayda Arizona, Kaliforniya, Yuta hám Virdjiniya shtatlarınıń húkimetleri óz veb-saytlarında Sitemapstı paydalanatuǵının járiyaladı[4].
Sitemaps protokolı «Skanerlewshilerge qolaylı veb-serverler» ideyalarına tiykarlanǵan, oǵan robots.txt arqalı avtomat túrde tabıw hám betlerdiń prioritetin hám ózgeriw jiyiligin kórsetiw imkaniyatı sıyaqlı jaqsılanıwlar kirgizilgen.
Maqseti
Sayt kartaları ásirese tómendegishe veb-saytlarda paydalı:
- Veb-sayttıń ayırım aymaqları kórip shıǵılatuǵın interfeys arqalı qoljetimli emes[5]
- Veb-masterler ádette izlew sistemaları tárepinen qayta islenbeytuǵın bay Ajax, Silverlight yamasa Flash mazmunın paydalanadı.
- Sayt júdá úlken hám veb-skanerlewshilerdiń ayırım jańa yamasa jaqında jańartılǵan mazmundı ótkerip jiberiw itimallıǵı bar.
- Veb-saytlarda izolyaciyalanǵan yamasa bir-birine jaqsı baylanıspaǵan kóp sanlı betler bolǵanda.
- Veb-saytta sırtqı siltemeler az bolǵanda.
Derekler
- ↑ Shivakumar. «Google Blog: Webmaster-friendly» (2-iyun 2005-jıl). 8-iyun 2005-jılda túp nusqadan arxivlendi. Qaraldı: 31-dekabr 2021-jıl.
- ↑ «Major Search Engines Unite to Support a Common Mechanism for Website Submission». News from Google (16-noyabr 2006-jıl). Qaraldı: 31-dekabr 2021-jıl.
- ↑ Pathak. «The Ask.com Blog: Sitemaps Autodiscovery». Ask's Official Blog (11-may 2007-jıl). 18-may 2007-jılda túp nusqadan arxivlendi. Qaraldı: 31-dekabr 2021-jıl.
- ↑ «Information for Public Sector Organizations». 30-aprel 2007-jılda túp nusqadan arxivlendi.
- ↑ «Learn about sitemaps | Search Central» (en). Google Developers. Qaraldı: 1-iyun 2021-jıl.