Srajatdin Axmetov

Srajatdin Axmetov
Сражатдин Ахметов
Tuwılǵan sánesi	1928-jılı(1928)
Tuwılǵan jeri	Shımbay rayonı, Qaraqalpaqstan
Qaytıs bolǵan sánesi	1996-jılı(1996)
Puqaralıǵı	SSRA →  Ózbekstan
Milleti	qaraqalpaq
Ilimiy tarawı	ádebiyattanıw, filologiya, ádebiy sın
Jumıs orınları	Nókis mámleketlik pedagogikalıq institutı, Qaraqalpaq mámleketlik universiteti
Bilim alǵan jeri	Nókis mámleketlik pedagogikalıq institutı, Moskva Ilimler Akademiyasınıń Shıǵıstanıw institutı
Ilimiy dárejesi	Filologiya ilimleriniń doktorı (1966)
Ilimiy ataǵı	Professor (1968)
Belgili isleri	Qaraqalpaq sovet poeziyası hám ádebiy sını boyınsha izertlewler
Sıylıqları	Berdaq atındaǵı sıylıq laureatı (1980), Ózbekstan hám Qaraqalpaqstanǵa miyneti sińgen ilim ǵayratkeri

Srajatdin Axmetov (Сражатдин Ахметов; 1928—1996) — iri qaraqalpaq ádebiyatshı alımı, professor hám ádebiy sınshı. Qaraqalpaq ádebiyatı tariyxın hám ádebiy sın tarawın rawajlandırıwǵa úlken úles qosqan tulǵalardıń biri.

Ómiri hám bilimi

Srajatdin Axmetov 1928-jılı Shımbay rayonında tuwılǵan. 1947-jılı Qaraqalpaq mámleketlik pedagogika institutınıń (házirgi Nókis mámleketlik pedagogikalıq institutı) qaraqalpaq tili hám ádebiyatı fakultetin pitkergen.

1950–1954-jılları Moskva qalasında SSSR Ilimler akademiyasınıń Shıǵıstanıw institutı aspiranturasında bilim aldı.

Iskerligi

Alımnıń iskerligi tiykarınan joqarı bilimlendiriw hám ilimiy-pedagogikalıq tarawlar menen baylanıslı:

• Dáslep pedagogikalıq institutta oqıtıwshı, docent, fakultet dekanı hám kafedra baslıǵı boldı.
• Keyinirek Qaraqalpaq mámleketlik universitetinde qaraqalpaq ádebiyatı kafedrasınıń meńgeriwshisi bolıp isledi.
• 1958-jıldan baslap Qaraqalpaqstan Jazıwshılar awqamınıń aǵzası boldı.

Ilimiy dóretiwshiligi

S. Axmetov qaraqalpaq poeziyası hám ádebiy sınınıń rawajlanıw jolların tereń izertledi:

• 1955-jılı «Ullı Watandarlıq urısqa shekemgi dáwirdegi qaraqalpaq poeziyası» temasında kandidatlıq dissertaciyasın jaqladı.
• 1966-jılı «Qaraqalpaq sovet poeziyasınıń ósiw jolları» temasında doktorlıq dissertaciyasın tabıslı qorǵadı.
• 1968-jılı professor ilimiy ataǵına iye boldı.

Onıń 200 den aslam ilimiy hám sın maqalaları, sonday-aq, birneshe iri monografiyaları járiyalanǵan. Ol, sonday-aq, joqarı oqıw orınları ushın «Ádebiyattanıw», «Qaraqalpaq ádebiyatı tariyxı» sıyaqlı sabaqlıqlardıń avtorlarınıń biri.

Miynetleri

• Ullı Watandarlıq urısqa shekemgi qaraqalpaq sovet poeziyası (1959);
• Qaraqalpaq poeziyası tariyxınıń ocherkleri (1961);
• Ádebiyat terminleriniń qısqasha sózligi (1974);
• Ádebiyat hám kritika (1978);
• Qaraqalpaq ádebiy sını (1992);
• Qaraqalpaqstan Respublikasınıń ádebiyatshı alımları hám sınshıları (1993).

Sıylıqları hám ataqları

• 1972 — Ózbekstanǵa miyneti sińgen ilim ǵayratkeri;
• 1974 — Qaraqalpaqstanǵa miyneti sińgen ilim ǵayratkeri;
• 1980 — Berdaq atındaǵı Qaraqalpaqstan Respublikası Mámleketlik sıylıǵınıń laureatı;
• «Bilimlendiriw aǵlası» kókirek belgisi.