Túrkmenbay Jiyemuratov
| Túrkmenbay Jiyemuratov Sadıkovich | |
|---|---|
 | |
| Tuwılǵan sánesi | 1953-jılı |
| Tuwılǵan jeri | Shımbay rayonı |
| Kásibi | shayır • pedagog alım |
| Oqıǵan jeri | Ózbekstan Milliy universiteti |
| Sıylıqları | «Ardaqlı nuranıy» kókirek belgisi |
Túrkmenbay Jiyemuratov Sadıkovich (Түркменбай Жийемуратов Садыкович; 1953, Shımbay rayonı) — shayır hám pedagog alım.
Ómir hám miynet jolı
[redaktorlaw | derekti redaktorlaw]T. Jiyemuratov 1953-jılı Shımbay rayonında tuwılǵan.
1970-jılı Shaxaman awılındaǵı orta mektepti tamamlaǵannan soń 1980-jılı Tashkenttegi Ózbekstan Milliy Universitetinin fizika fakultetin pitkergen.
Miynet jolın 1980-jılı Nókis qalasındaǵı 21-sanlı orta mektepte muǵallim bolıp islewden baslaǵan. Soń direktordıń oqıw-tárbiya isleri boyınsha orınbasarı, mektep direktorı, Qaraqalpaqstan Respublikası Xalıq bilimlendiriw ministrligi Oqıw-metodikalıq orayınıń aǵa metodisti, birinshi kategoriyalı qánige-metodisti (1990-94), 1994-jıldan búgingi kúnge shekem Ájiniyaz atındaǵı Nókis mámleketlik pedagogikalıq institutınıń «Pedagogika» kafedrasında oqıtıwshı bolıp islep atır.
Házirgi kúnde «Ulıwma pedagogika» kafedrasınıń docenti lawazımında islep atır.
T. Jiyemuratov 1997-jıldan Jazıwshılar awqamınıń aǵzası.
Dóretiwshiligi
[redaktorlaw | derekti redaktorlaw]Ilimiy dóretiwshiligi
[redaktorlaw | derekti redaktorlaw]Jumıstan qol úzbey «Qaraqalpaqstanda mektepten tısqarı tálim mákemeleriniń qáliplesiwi hám rawajlanıwı» degen temada kandidatlıq dissertaciyasın jaqladı.
T. Jiyemuratovtıń «Fizika terminleriniń túsindirme sózligi» (1996) atlı ilimiy kitabı, sonday-aq jetpisten aslam ilimiy-pedagogikalıq, metodikalıq maqalaları baspasózde járiyalandı.
Ádebiy dóretiwshiligi
[redaktorlaw | derekti redaktorlaw]Onıń Muradıy degen ádebiy laqap penen «Gózzallıq» (1993), «Ushırattım bir gózzaldı» (1995) «Rubayılar» (2010-j.), «Kárwan» (2013-j.), «Ǵáziyne» (2016-j.), «Degish» (2018-j.), «Ándiyshe» (2021-j.), «Qızıl jıńǵıl gúlleri» (2021-j.) atlı poeziyalıq toplamları hám «Jaraǵan túye» (2012-j.) atlı gúrrińler toplamı «Qaraqalpaqstan» hám «Bilim» baspalarında óz aldına kitap bolıp basılıp shıqtı.
Sonday-aq Túrkmenbaydıń «Jaslar orbitası» (1986-j.), «Jaslar hawazı» (1987-j.), «Qus jolı» (1989-j.), «Mehringizni twyib yashadim», (Nukus-2015y.), «Navoiydan savod ochdim» (Toshkent (2016y.), «Men tuwılǵan úy» (Nókis-2018-j.), «Qaraqalpaq balalar ádebiyatınıń antologiyası» (Nókis-2018-j.) toplamlarında qosıqları, gúrrińleri basılıp shıqtı.
Awdarmashılıǵı
[redaktorlaw | derekti redaktorlaw]Sonıń menen birge awdarmashı shayır sıpatında belgili ózbek shayırlarınan: Muhammed Áliy, Abdulla Sher, Ochil Tahir, Rashidxon Shukurovtıń qosıqların hám Omar Hayyamnıń rubayıların qaraqalpaq tiline awdarıp respublikalıq baspa sóz betlerinde járiyaladı. Belgili ózbek jazıwshılarınan: Haydar Muhammad, Habib Siddiq, Saydulla Siyoev, Jwra Fozil, Adhambek Alimbekovlardıń gúrrińlerin qaraqalpaq tiline awdarıp respublikalıq baspa sózde járiyaladı.
Ádebiyatlar
[redaktorlaw | derekti redaktorlaw]- Қарақалпақстан Республикасы жазыўшылары (библиографиялык мағлыўмат) / нашрга тайёрловчи 3. Бекбергенова -T .: Extremum press , 2011. 240 бет. ISBN 978-9943-356-45-0