Uta Abe
| Uta Abe | |
|---|---|
 Uta Abe 2024-jılda | |
| Jeke maǵlıwmatları | |
| Jınısı | hayal |
| Puqaralıǵı |  Yaponiya |
| Tuwılǵan sánesi | 2000-jıl 14-iyul |
| Boyı | 1.58 m |
| Sport | |
| Sport túri | Dzyudo |
Uta Abe (yaponsha: 阿部 詩 Abe Uta; 2000-jıl 14-iyul, Kobe) — yaponiyalı dzyudoshı, 5-dana Kodokan (2022), 2020-jılǵı Olimpiada oyınları chempionı, 52 kilogrammǵa shekemgi salmaq kategoriyasında bes márte 2018, 2019, 2022, 2023, 2025-jıllarda jáhán chempionı.
Biografiyası
[redaktorlaw | derekti redaktorlaw]Uta Abe — dzyudoshı, Olimpiada hám 4 márte jáhán chempioni Xifumi Abenıń qarındası[1].
Abe IJF (Xalıqaralıq dzyudo federaciyası) Gran-prisinde jeńimpaz bolǵan eń jas dzyudoshı boldı: ol 2016-jıldıń fevral ayında Dyusseldorf Gran-prisinde birinshi orındı iyeledi[2].
Ol 2018-jılı Bakude ótkerilgen jáhán chempionatında qatnasıp, 18 jasında birinshi márte jáhán chempionı ataǵın qolǵa kirgizgen. Uta dúnyanıń eń jaqsı dzyudoshısı ataǵın qolǵa kirgizgen tariyxtaǵı úshinshi eń jas dzyudoshı boldı[3]. Abe dáslep polshalı dzyudoshı Karolina Penkovskayanı, keyin shveycariyalı Fabien Kocherdi jeńdi. Keyin ala ol braziliyalı Jessika Pereyra ústinen jeńiske eristi, yarım finalda franciyalı Amandin Byushardı 40 sekundtan kem waqıt ishinde jeńip shıqtı. Finalda Abe watanlası hám sol waqıttaǵı jáhán chempionı Ai Sisimege qarsı gúres alıp bardı hám altın medaldı qolǵa kirgizdi.
2019-jılı Tokioda ótkerilgen Olimpiadaǵa shekemgi jáhán chempionatında ol finalda rossiyalı Natalya Kuzyutinanı jeńip, altın medaldı qolǵa kirgizdi.
2020-jılǵı Olimpiada oyınlarında 52 kilogrammǵa shekemgi salmaq kategoriyasında final bellesiwinde franciyalı Amandin Byushardı jeńip, altın medaldı qolǵa kirgizdi.
2023-jıldıń may ayında Qatar paytaxtında ótkerilgen jáhán chempionatında 52 kilogrammǵa shekemgi salmaq kategoriyasında yaponiyalı dzyudoshı finalda ózbekstanlı Diyora Keldiyorovanı jeńip, chempion boldı.
2024-jıl 28-iyul kúni Parijde ótkerilgen Olimpiada oyınlarında 1/16 bellesiwlerde ózbekstanlı sportshı Diyora Keldiyorovaǵa 1:10 esabında jeńilip, Olimpiada chempionı ataǵın qoldan jiberdi. Uta Abe turnir favoritı, házirgi Olimpiada chempionı hám tórt márte jáhán chempionı, bes jıl dawamında dzyudo boyınsha jáhán jarıslarında jeńiliske ushıramaǵan edi. Uta Abe sońǵı márte 2019-jıl noyabr ayında franciyalı Amandin Byusharǵa 47 jeńislerden aldın jeńiliske ushıraǵan edi. Jeńilisten soń 24 jaslı yaponiyalı sportshı kóz jasına boyalıp, matqa betin basıp jatıp qaldı. Ol ornınan turǵannan keyin de jılawın toqtatpadı, trener bolsa onı jubatıw ushın barlıq ilajlardı kórdi[4].
2025-jıldıń iyun ayında Budapeshtte ótkerilgen jáhán chempionatında 52 kilogrammǵa shekemgi salmaq kategoriyasında altın medaldı qolǵa kirgizdi. Chempionlıq ushın bellesiwde kosovolı qarsılası Distriya Krasnichi ústinen jeńiske eristi[5].
Derekler
[redaktorlaw | derekti redaktorlaw]- ↑ «Hifumi Abe and sister Uta top podium at Grand Slam Tokyo» (en). The Japan Times Online (2017-jıl 3-dekabr). 2018-jıl 21-sentyabr sánesinde túp nusqadan arxivlendi. Qaraldı: 2018-jıl 21-sentyabr.
- ↑ «Abe makes history with Grand Prix win» (en). The Japan Times Online (2017-jıl 25-fevral). 2018-jıl 11-sentyabr sánesinde túp nusqadan arxivlendi. Qaraldı: 2018-jıl 21-sentyabr.
- ↑ «Uta Abe makes miracles come true with World title» (en). JudoInside.com. 2018-jıl 21-sentyabr sánesinde túp nusqadan arxivlendi. Qaraldı: 2018-jıl 21-sentyabr.
- ↑ «Диёра Келдиёрова попросила узбекистанцев перестать писать негативные комментарии Уте Абэ» (ru). Газета.uz. Qaraldı: 2024-jıl 25-avgust.
- ↑ «У Японии третье золото, итоги второго дня ЧМ-2025 по дзюдо» (ru). sportaran.com. Qaraldı: 2025-jıl 15-iyun.