Xanım Saparova

Xanım Saparova
Tuwılǵan sánesi	5-mart 1936-jılı(1936-03-05)
Tuwılǵan jeri	Kegeyli rayonı
Qaytıs bolǵan sánesi	5-noyabr 2005-jılı(2005-11-05) (69 jasta)
Kásibi	teatr aktrisası
Ataqları	«Qaraqalpaqstanda xızmet kórsetken artist» (1969) «Qaraqalpaqstan xalıq artisti» (1983) «Ózbekstanda xızmet kórsetken artist» (1992)

Xanım Saparova (1936-jıl 5-mart - 2005-jıl 5-noyabr) — «Qaraqalpaqstanda xızmet kórsetken artist», «Qaraqalpaqstan xalıq artisti», «Ózbekstanda xızmet kórsetken artist».

Ómiri

X.Saparova 1936-jılı 5-mart kúni Kegeyli rayonında tuwılǵan. Jaslayınan kórkem ónerge qızıǵıp, mektepte oqıp júrgen waqıtlarında háweskerler dógereklerine qatnasıp, jaǵımlı qosıqları menen qatar-qurbıları arasında kózge túse baslaydı.

Onıń kórkem-ónerge bolǵan qızıǵıwshılıǵı Nókiske Berdaq atındaǵı Qaraqalpaq mámleketlik muzıkalı teatrınıń saxnasına alıp keldi.

1956-jılı usı teatrǵa aktrisa bolıp jumısqa keledi. Usı jıldan baslap, húrmetli dem alısqa shıqqanǵa shekem onıń ómiri teatr menen ajıralmas baylanısta bolıp, saxnada pidáyı xızmet etti.

Saxnadaǵı iskerligi

Arnawlı bilimge iye bolmasa da, tábiyat inam etken jaǵımlı hawazı, tuwma talantı menen sanalı ómiriniń 40 jılǵa shamalasın saxnaǵa baǵıshlaydı. Ol barlıq kúsh jigerin, júrek yoshın, ózi dóretken janlı obrazlarda sáwlelendirip, tamashagóylerdiń alǵıslarına, xalıqtıń húrmetine miyasar boldı.

Ol teatr saxnasında qoyılǵan hár qıylı janrlardaǵı spektakllerde túrli xarakterdegi hayal-qızlardıń álwan túrli obrazların  jarattı.

Onıń dóretken «Súymegenge súykenbe»de Aysanem, Parshagúl, «Ǵárip ashıq»ta Shahsanem, «Qozı kórpesh-Bayan sulıw»da Bayan, «Kúygelek kózli yar»da Dilara, «Jaylawda toy»da Gúlsanem, «Qırıq qız»da Gúlayım, «Qáyin ene»de Afat, «Aqmaq patsha»da Gúlim, «Jınayatshı kim»de Názigúl, «Kelinler qozǵalańı»da Bashorat, «Saq ǵarǵa saǵaǵınan»da Netayxan, «Muhabbatım gózzallıq»ta Perdesh, «Jetinshi papam»da Qarshıǵa, «Bir úyde eki ómir»de Biybigúl hám basqa da kóplegen spektakllerdegi tákirarlanbas obrazları qaraqalpaq teatr tariyxında óshpes háripler menen jazılıp qaldı.

Jetiskenlikleri

X.Saparovanıń kórkem-ónerimizdi rawajlandırıwǵa qosqan úlesleri húkimetimiz tárepinen óz waqtında ádil bahalanıp, oǵan 1969-jılı «Qaraqalpaqstanda xızmet kórsetken artist», 1983-jılı «Qaraqalpaqstan xalıq artisti», 1992-jılı «Ózbekstanǵa xızmet kórsetken artist» ataqları berildi.

Xanım Saparova óziniń jaratqan ólmes obrazları menen xalqımızdıń kewlinen jay alǵan aktrisa. Óziniń teatrdaǵı kóp jıllıq miynetleri menen, Qaraqalpaq teatr kórkem óneriniń rawajlanıwında úlken úlesin qosıp ketti.