Yaqıpbay Ájimov
| Yaqıpbay Ajimov | |
|---|---|
| Tuwılǵan sánesi | 4-yanvar 1955-jılı (71 jasta) |
| Tuwılǵan jeri | Jalpaqjap awılı, Kegeyli rayonı |
| Dóretiwshilik túri | proza, poeziya, awdarma |
| Oqıǵan jeri |
|
| Shıǵarmalarınıń tili | qaraqalpaq tili |
Yaqıpbay Ajimov (Яқыпбай Ажимов; 1955-jıl 04-yanvar, Kegeyli rayonı) — shayır hám jazıwshı.
Ómiri
[redaktorlaw | derekti redaktorlaw]Yaqıpbay Ajimov
Yaqıpbay Ajimov 1955-jıl yanvar ayınıń 4-sánesinde Kegeyli rayonınıń «Jalpaq jap» APJ aymaǵında tuwılǵan. Orta mektepti tamamlaǵannan soń Nókis energetika texnikumında bilim alǵan. Soń armiya qatarında xızmet etken.
1978-84 jılları Nókis mámleketlik universitetinde oqıǵan. Filolog, Qaraqalpaq tili hám ádebiyatı oqıtıwshısı qániygeligin iyelegen.
Yaqıpbay Ajimov mektep oqıwshısı gezinen baslap-aq ádebiyatqa ıqlas qoyǵan. 1970-jılı onıń «Awılım» atlı tuńǵısh qosıǵı baspasózde jarıq kórgen.
1982-91 jıllar aralıǵında «Jetkinshek» gazetasında ádebiy xızmetker, bólim baslıǵı, juwaplı xatker hám bas redaktor orınbasarı lawazımlarında islegen.
Sońınan «Aral», «Qaraqalpaqstan» baspası, «Ámiwdárya», «Qaraqalpaqstan» jurnallarında bas redaktordıń orınbasarı,
2001-jıldan 2017-jıl aralıǵında Qaraqalpaqstan Respublikası Ruwxıylıq hám aǵartıwshılıq orayında baslıqtıń orınbasarı lawazım- larında xızmet etken.
Ol usı jıllar dawamında «Jetkinshek»ten qol úzbegen. 2017-jıldan 2023-jılǵa shekem usı gazetanıń ádebiy másláhátshisi wazıypasın atqarǵan.
Sonday-aq, Nókis qalasındaǵı 16-sanlı mektepte úgit-násiyatshı bolıp islegen.
Dóretiwshiligi
[redaktorlaw | derekti redaktorlaw]Ya. Ájimov mektepte oqıp júrgen gezlerinen-aq ádebiyatqa ayrıqsha ıqlas qoyǵan. Onıń «Awılım» atlı tuńǵısh qosıǵı 1970-jılı rayonlıq gazetada basılıp shıqqan. Yaqıpbay Ajimovtıń onǵa jaqın balalarǵa arnalǵan kitapları jarıq kórgen. Olardan: «Men súyemen gúllerdi», «Aqquwlar atawı», «Bar eken de joq eken», «Erkebaydı erke demeń», «Eshkiniń nege saqalı bar?», «Ógiz mingen bala», «Dáwranbek hám dosları», «Betashar» h.t.b. Sonday-aq, onıń awdarmasında D.Defonıń «Robinzon Kruzo», A.Tolstoydıń «Buratinonıń basınan keshirgenleri», «Afrika xalıq ertekleri», «Nasratdin aytqan eken» atlı kitapları basılıp shıqtı. Yaqıpbay Ajimovtıń kóplegen shıǵarmaları mektep oqıwshılarınıń sabaqlıqlarına da kirgizilgen. Balalarǵa arnalǵan otızǵa jaqın qosıqlarına nama jazılǵan. Yaqıpbay Ajimov úlkenler ushın da shıǵarmalar jazdı. Onıń «Jazmısh jazası», «Saqlanǵan sır», «Ullı ruwxlar táshwishi», «Shopan qızdıń dápteri», «Muhabbattıń maǵızlı hám muńlı máwritleri» h.t.b povest, esse, gúrrińleri baspa sózde jarıq kórdi. Yaqıpbay Ajimov Qaraqalpaqstan jazıwshılar awqamı Balalar ádebiyatı Keńesi baslıǵı.
Sıylıqları
[redaktorlaw | derekti redaktorlaw]Yaqıpbay Ajimovtıń miynetleri Húkimetimiz tárepinen joqarı bahalandı. Ol «Ózbekstan Respublikası Ǵárezsizligine 20 jıl», «Ózbekstan Respublikası Ǵárezsizligine 25 jıl» kókirek nıshanları, «Qaraqalpaqstan Respublikasına miyneti sińgen jurnalist» húrmetli ataǵı, «Ardaqlı Nuranıy», «Qaraqalpaqstan xalıq bilimlendiriw aǵlası» kókirek nıshanları menen sıylıqlandı. Sonday-aq, onıń miynetleri Qaraqalpaqstan Respublikası Joqarǵı Keńesi Prezidumınıń Húrmet jarlıǵı, basqa da ministrlikler menen shólkemlerdiń sıylıqlarına ılayıq boldı. Yaqıpbay Ajimov 1984-jıldan Ózbekstan jurnalistler awqamınıń, 1995-jıldan Ózbekstan jazıwshılar awqamınıń aǵzası. Yaqıpbay Ajimov búgingi kúni húrmetli dem alısta. Ol úsh ul, on aqlıqtıń atası.
Ádebiyatlar
[redaktorlaw | derekti redaktorlaw]- Қарақалпақстан Республикасы жазыўшылары (библиографиялык мағлыўмат) / нашрга тайёрловчи 3. Бекбергенова -T .: Extremum press , 2011. 240 бет. ISBN 978-9943-356-45-0