Yoga

Yoga (sanskritshe - birlesiw, sóylesiw) - 1) insan psixologiyası hám fiziologiyasın basqarıw táliymatı hám metodı. "Qutılıw" (moksha yamasa nirvana) halına erisiwdi maqset etip qoyǵan hind diniy hám filosofiyalıq sistemalarınıń quramlıq bólegi. Insanda (ruwxtı belgili bir tárizde sazlaw arqalı) organikalıq hám anorganikalıq procesler hám denelerdi basqarıw ushın qanday da bir kúsh hám imkaniyatlar bar ekenligin tán aladı. Yogada fizikalıq shınıǵıwlar sisteması islep shıǵılǵan hám organizmniń dem alıw hám t.b. fiziologiyalıq funkciyaların basqarıwda, insanda qálegen ruwxıy jaǵdaydı júzege keltiriwde belgili tabıslarǵa erisilgen. Tiykargı filosofiyalıq ideyası - insan psixofiziologiyası menen álem arasındaǵı únleslik; 2) hind filosofiyasındaǵı 6 ortodoksal (vedalardı tán alatuǵın) sistemalardan biri. Áyyemgi hind filosofı Patanjali (eramızǵa shekemgi 2-ásir menen eramızdıń 2-ásir aralıǵı) tiykar salǵan. Yoga metodları tábiyat hám funkciyaların, olardı qollanıw basqıshları hám basqalardı izertlegen. Ulıwmalıq filosofiyalıq máselelerde sankxya táliymatına kiredi.