Yuldash Ibragimov
| Yuldash Ibragimov | |
|---|---|
| Yo‘ldosh Matkarimovich Ibragimov | |
| Tuwılǵan sánesi | 7-noyabr 1942 |
| Tuwılǵan jeri | Xojeli rayonı, Qaraqalpaqstan |
| Qaytıs bolǵan sánesi | 25-may 2026 (83 jasta) |
| Ilimiy tarawı | filologiya, lingvistika, dialektologiya |
| Jumıs orınları | Nókis mámleketlik pedagogikalıq institutı |
| Bilim alǵan jeri | Samarqand mámleketlik universiteti |
| Ilimiy dárejesi | Filologiya ilimleriniń doktorı |
| Ilimiy ataǵı | Professor |
| Belgili isleri | Qubla Aral boyı ózbek dialektleriniń lingvogeografikalıq atlası |
| Sıylıqları | Qaraqalpaqstanǵa xızmet kórsetken ilim ǵayratkeri |
Yuldash Matkarimovich Ibragimov (Юлдаш Ибрагимов; 1942-jıl 7-noyabr — 2026-jıl 25-may) — qaraqalpaqstanlı belgili filolog alım, filologiya ilimleriniń doktorı, professor. Qaraqalpaqstanǵa xızmet kórsetken ilim ǵayratkeri hám Qaraqalpaqstan Respublikası xalıq bilimlendiriw aǵlası.
Ómiri hám tálimi
[redaktorlaw | derekti redaktorlaw]Yuldash Ibragimov 1942-jıl 7-noyabrde Qaraqalpaqstan Respublikası Xojeli rayonı Aybek atındaǵı diyqan xojalıǵına qaraslı «Qurbanoq» awılında diyqan shańaraǵında tuwılǵan. Onıń balalıq hám jaslıq jılları ekinshi dúnya júzilik urıs hám urıstan keyingi qıyınshılıqlar dáwirine tuwrı keldi.
1959–1961-jıllarda Xojeli pedagogikalıq uchilishesinde bilim aldı. 1961-jılı Áliysher Nawayı atındaǵı Samarqand mámleketlik universitetiniń Filologiya fakultetine oqıwǵa kirip, onı 1966-jılı ayrıqsha diplom menen tamamladı.
Miynet jolı
[redaktorlaw | derekti redaktorlaw]Ol óziniń miynet jolın Xojeli rayonındaǵı N.K.Krupskaya atındaǵı orta mektepte ózbek tili hám ádebiyatı páni muǵallimi bolıwdan basladı. Keyinirek ómiriniń tiykarǵı bólimin joqarı tálimge baǵıshladı. Kóp jıllar dawamında Ájiniyaz atındaǵı Nókis mámleketlik pedagogikalıq institutınyń ózbek tili kafedrasında docent hám professor lawazımlarında nátiyjeli miynet etti.
Ilimiy iskerligi
[redaktorlaw | derekti redaktorlaw]Professor Yu.Ibragimov kóp qırlı ilimpaz retinde ózbek tili tariyxı, leksikologiyası, morfologiyası hám dialektologiyası boyınsha tereń izertlewler alıp bardı. Ol ásirese Qubla Aral boyı ózbek dialektlerin lingvogeografikalıq aspektte izertlegen hám bul tarawdaǵı dáslepki dialektologiyalıq atlası jaratqan alım retinde tanıldı.
Alım óz iskerligi dawamında 3 monografiya, 2 oqıw qollanba, 230 dan artıq ilimiy-metodikalıq maqalalar járiyaladı. Onıń eń áhmiyetli miynetleriniń qatarına tómendegiler kiredi:
- «Qoraqalpog‘istondagi o‘zbek shevalarida «Feʼl» (1981);
- «Исследование узбекских говорах Приараля» (1992);
- «Лексика узбекских говорах Приараля» (1996);
- «O‘zbek tilida «Feʼl» mavzusini modelli o‘qitishning taʼlim texnologiyasi» (2018).
Sporttaǵı jetiskenlikleri
[redaktorlaw | derekti redaktorlaw]Yuldash Ibragimov tek ilim menen sheklenbesten, sporttıń erkin gúres túri boyınsha da úlken tabıslarǵa erisken. Ol bir neshe márte Qaraqalpaqstan hám Ózbekstan birinshilikleriniń sıylı orın iyesi bolǵan. 1963-jılı Ózbekstan Respublikasında ótkerilgen «Burevestnik» toparı jarısında chempionlıqtı qolǵa kirgizgen.
Sıylıqları
[redaktorlaw | derekti redaktorlaw]Ilim hám sport tarawındaǵı xızmetleri ushın tómendegi ataqlar hám sıylıqlar menen sıylıqlanǵan:
- Qaraqalpaqstanǵa xızmet kórsetken ilim ǵayratkeri;
- Qaraqalpaqstan Respublikası xalıq bilimlendiriw aǵlası;
- Ózbekstan Respublikası Joqarǵı Sovetiniń «Húrmet jarlıǵı».