Wikipedia — erkin enciklopediya
Qamır ushın júweri unınan paydalanıladı. Qaraqalpaq asxanasında júweri eń kóp tutınatug'ın ónimlerden biri esaplanadı, júweri unınan júdá kóp awqatlar tayarlanadı. Zaǵara qamırın tayarlaw ushın júweri unı, biyday unı hám geshir yamasa asqabaq, qaynaǵan ıssı suw paydalanıladı. Júweri unı menen az muǵdardaǵı biyday unı ıssı suwda qarılıp, oǵan suwda qaynatılǵan asqabaq yamasa geshir qosılıp, aralastırılıp qarıladı. Zaǵara qamırın tayarlaw belgili dárejede kúshti talap etedi. Tayın bolǵan qamır biraz waqıt tındırıladı hám zuwalalarǵa bólinip, zaǵara kórinisine keltiriledi. Qızıp turǵan tandırǵa zaǵaralar basılıp, tandırdıń awzı bekkem jawıp qoyıladı. 20-30 minutlar shamasında qızarıp pisken zaǵaralar tayın boladı. Zaǵara dámi ápiwayı nanlardan u'lken parıq qıladı, ol qattılaw, anıq nan dámine iye emes, bıraq júdá toyımlı.
