Paydalanıwshı:Qaraqalpaqpan/qaralama
Google Flights — úshinshi tárep támiyinlewshileri arqalı aviabiletlerdi izlew hám satıp alıwdı ańsatlastıratuǵın onlayn xızmet. Ol 2011-jılı Google tárepinen iske túsirildi hám házirgi waqıtta Google Traveldiń bir bólegi esaplanadı[1].
Google Flights júdá kúshli izlew sistemasına iye hám onıń eń jaqsı tárepi onnan paydalanıwdıń ańsatlıǵında bolıp tabıladı. Ol sizge belgili bir izlewdiń nátiyjesi sıpatında derlik barlıq ámeldegi reyslerdi kórsetedi, sonıń menen birge sizdi bronlap qoyıwǵa májbúrlemeydi. Google Flights Expedia, Orbitz, Tripadvisor yamasa Kayaktan ayrıqsha bolıp, ol onlayn sayaxat agentligi emes. Bunda siz ámeldegi reysler menen tanısıp, ózińizge jaqqan reyslerdi tapqanıńızdan keyin bronlap qoyıw ushın «dawam etiw» túymesine basasız. Nátiyjede siz tuwrıdan-tuwrı aviakompaniyanıń yamasa úshinshi tárep onlayn sayaxat agentliginiń saytına ótesiz.[2].
Tariyxı[redaktorlaw | derekti jańalaw]
2011-jıl aprel ayında Amerika Qurama Shtatları Ádillik ministrliginiń antimonopoliya bólimi Google korporaciyasınıń ITA Software programmalıq támiynatın 700 million AQSh dollarına satıp alıwın maqulladı[3]. 2011-jıl 13-sentyabrde Google bul satıp alınǵan algoritmlerden paydalanıp Google Flights xızmetin iske túsirdi[4].
Qásiyetleri[redaktorlaw | derekti jańalaw]
Google Flightstıń innovaciyası sonda, ol jetip barıw mánzilin kórsetiwden tısqarı (ushıp ketiw mánzili standart jaǵdayda paydalanıwshınıń jaylasqan ornınan kelip shıǵıp avtomatikalıq túrde kirgizilgen boladı) basqa da kriteriyler tiykarında sheklenbegen izlewlerdi orınlaw imkaniyatın beredi. Mısalı, paydalanıwshı túrli waqıtlardaǵı hám hár qıylı byudjet sheńberindegi ushıwlardı izlewi hám túrli jónelislerdi tańlawı múmkin[5]. Usınıń menen bir qatarda, eger paydalanıwshı jetip barıw mánzilin tańlaǵanda, Google Flights keyingi 12 aydıń hár bir kúni ushın hár bir reys bahasın grafik yamasa kestede kórinisinde esaplap shıǵarıp beredi. Bul funksiya paydalanıwshılarǵa belgili bir mánzilge ushıw ushın eń arzan bahanı ańsat anıqlaw imkaniyatın beredi. Google Flights paydalanıwshılarǵa olardıń ushıwlarınıń ıqlımǵa tásirin de esaplaw múmkinshiligin beredi. Biraq 2022-jıl iyul ayında bul qosımsha ásbap ushıwlardıń ıqlımǵa tásirin esaplawdıń usılın ózgertti, yaǵnıy karbonat angidrid (CO2) gazinen basqa ajıralıp shıqqan zatlardıń barlıǵı ushıwlardıń globallıq ısıwǵa tásiri esaptan shıǵarıp taslandı hám bul hár bir ushıwdıń ıqlımǵa tásiriniń esaplıq muǵdarın eki esege kemeytti. Bul háreket ekologiya aktivleriniń hám ilimiy jámiyetshiliktiń narazılıǵına sebep boldı[6].
Tómende Google Flights xızmetiniń tutınıwshılar tárepinen ayrıqsha atap ótilgen eń qolay tárepleri kórsetilgen:
- Tezlik: Google Flights basqa hár qanday ushıwlardı izlew sistemasına qaraǵanda tezirek bolıp, aylıq tariflerdi bir neshe sekundlarda shıǵarıp beredi.
- Kalendarǵa tiykarlanǵan tarif kórinisi: Google Flights ápiwayı, intuitivlik kalendar kórinisine iye bolıp, ol sizge keyingi 12 ay ishindegi eń arzan tarifti kórsetip beredi.
- Bir waqıtta bir neshe izlew: Google Flights izlew procesin páseytpesten, 7 noqattan 7 danaǵa shekem bolǵan aeroportlar arasındaǵı eń arzan tarifti izlew imkaniyatın beredi.
Derekler[redaktorlaw | derekti jańalaw]
- ↑ Li, Abner „New Google Travel site replacing Google Trips app“ (en-US). 9to5Google (14-may 2019-jıl). Qaraldı: 7-may 2021-jıl.
- ↑ "What's new at Google Flights?" (in en). https://thepointsguy.com/guide/google-flights-guide.
- ↑ Ryan Singel. „Feds Clear Google to Buy ITA Travel Search Company, Conditions Apply“. Wired (8-aprel 2011-jıl). Qaraldı: 13-sentyabr 2011-jıl.
- ↑ Ryan Singel. „Google Upgrades Flight Search to the Jet Age“. Wired (13-sentyabr 2011-jıl). Qaraldı: 13-sentyabr 2011-jıl.
- ↑ Julianne Pepitone. „Google launches Flight Search – with a feature rivals lack“. CNN (13-sentyabr 2011-jıl). Qaraldı: 13-sentyabr 2011-jıl.
- ↑ „Google change reduces airline emissions calculations“. BBC News. Qaraldı: 25-avgust 2022-jıl.