Islam Kárimov
Biografıyası:[redaktorlaw | derekti jańalaw]
Ózbekstan Respublikasınıń birinshi prezidenti Islam Kárimov 1938-jılı 30-yanvarda Samarqand qalasında tuwılǵan.
Islam Kárimov Orta Aziya Politexnika hám Tashkent Xalıq xojalıǵı institutların tamamlaǵan[1]. Miynet jolın 1960-jılı Tashkent awıl xojalıq mashina ońlaw zavodında baslaǵan. Soń V.P.Chkalov atındaǵı Tashkent Aviaciya óndirislik birlespesinde injener, jetekshi injener-konstruktor bolıp isledi.
1966-jılı Ózbekstan SSR Mámleketlik plan komitetine jumısqa ótip, bas injenerlikten respublika Mámleketlik plan komiteti baslıǵınıń birinshi orınbasarı bolıwǵa shekemgi joldı basıp ótti.
Islam Kárimov 1983-jılı Ózbekstan SSR Qarjı ministri, 1986-jılı Ózbekstan SSR Ministrler Keńesi Baslıǵınıń orınbasarı, respublika Mámleketlik plan komitetiniń baslıǵı etip tayınlandı. 1986-1989-jıllar dawamında Qashqadárya wálayatı partiya komitetiniń birinshi sekretarı, 1989-jıldıń iyun ayınan baslap Ózbekstan Kompartiyası Oraylıq Komitetiniń birinshi sekretarı lawazımlarında isledi.
Ol 1990-jıl 24-mart kúni Ózbekstan SSR Joqarǵı Keńesiniń sessiyasında Ózbekstan SSR Prezidenti etip saylandı. 1991-jılı 31-avgustta I.Kárimov tariyxıy waqıya – Ózbekstan Respublikasınıń mámleketlik ǵárezsizligin járiyaladı. 1991-jıl 29-dekabrde alternativlik tiykarında ótkerilgen ulıwma xalıqlıq saylawda I.Kárimov Ózbekstan Respublikası Prezidenti etip saylandı.
Ózbekstan Respublikasınıń birinshi prezidenti Islam Kárimov 2016-jıldıń 2-sentyabr kúni, 78 jasında Tashkent qalasında qaytıs boldı. Ol 2016-jılı 3-sentyabrde Samarqand qalasında jerlendi.
Sıylıqları:[redaktorlaw | derekti jańalaw]
Islam Kárimov suveren hám ǵárezsiz Ózbekstandı qurıw, xalıqshıl demokratiyalıq huqıqıy mámleket jaratıw, puqaralardıń tınıshlıǵı hám milliy tatıwlıqtı támiyinlewge qosqan úlken úlesi hám bul baǵdarda mártlik hám qaharmanlıq kórsetkeni ushın «Ózbekstan Qaharmanı» ataǵı, «Ǵárezsizlik» hám «Ámir Temur» ordenleri menen sıylıqlanǵan.