Кevin Karter

QARAQALPAQ WİKİPEDİASININ' MAG'LIWMATI
Kevin Karter
AtıKevin Karter
Tuwılǵan1960-jıl 13-sentyabr
Qaytıs bolǵan1994-jıl
SıylıqlarıPulitzer Prize


Kevin Karter 1960-jılı 13-sentyabrde Qubla Afrikanıń Yoxannesburg qalasında tuwılǵan. Ol 1990-jıllardaǵı Qubla Afrikadaǵı Bang-Bang Club fotograflar toparınıń aǵzası bolǵan.

Kevinniń Sudanǵa sayaxatı[redaktorlaw | derekti jańalaw]

"Kamera aldındaǵı ólim" 1993-jıl. Sudan

Kevin Karter Sudandaǵı ǵalaba ashlıqtı súwretke alıw maqsetinde BMSh menen birgelikte fotograf kásiplesi Joao Silve menen Sudanǵa baradı. Kevin Sudannıń Ayod awılındaǵı jaǵdaydı súwretke túsirip atırǵan waqıtta ol ashlıqtan ólip atırǵan kishkene qızdı hám sol qızdıń ólimin kútip atırǵan qara qustı kórip qaladı. Bunday kórinisti fotograf kadrǵa mórlew ushın súwretke túsiredi hám sońınan qustı ushırıp jiberip, ózi waqıya ornınan ketip qaladı.

Kevin Karter

Ájayıp súwretti alǵanlıǵına kewli tolıp, dostısına kórsetip maqtanadı. Kadrdı kórgen dostısı da bul kórinisti ózi súwretke alıwdı qálep, sol orınǵa alıp barıwın soraǵanda, Kevin qustı ushırıp jibergenligin aytadı. Bul waqıtta qızdıń ata-anası gumanitar járdem alıw ushın qızdı yarım saatlarǵa jalǵız qaldırǵan edi.

1993-jılı 25-mart sánesinde alınǵan fotosúwret Karterge úlken jetiskenlik alıp keledi. Fotosúwret «The New York Times» gazetası tárerpinen satıp alınadı hám erteńine gazetada járiyalanıp, jámiyetshilikte úlken rezonans oyatadı. Karter ǴXQnıń hújimler obektine aylanadı hám adamgershiliksizlikte ayıplanadı. Sol waqıtta «St. Petersburg Times» gazetası fotograf hám waqıya haqqında bılay jazadı:

«Ólim menen gúresip atırǵan náresteni áwmetli kadrǵa alıw ushın obektivin sazlaǵan adam da – jırtqısh, jáne bir qara qus…».

Bul súwret 1994-jılı Pulicer sıylıǵınıń kórkem fotografiya tarawı boyınsha eń jaqsı súwret sıpatında tańlanıp, Kevin jeńimpaz dep tabıladı.

Kevinniń ólimi[redaktorlaw | derekti jańalaw]

Karter sıylıqtı alǵannan soń 4 aydan keyin 1994-jılı 27-iyul kúni 33 jasında óz janına qas etedi. Fotograf ólimi aldınan tómendegi mazmunda xat qaldıradı:

«Túskinlikke tústim... Telefon óshirildi... Kireyge pul joq... Balalarǵa pul joq... Tólewge pul joq... PUL!!! Meni ólim, ólikler, ǵázep hám awırıwlar... ash hám jaraqatlanǵan balalar haqqındaǵı eslewler qıynaydı. Nesip etse, Ken (fotograf dostısı) menen ushırasaman...»

Maǵlıwmatlarǵa qaraǵanda bul súwrettegi negizinde qız emes, Kong Nong atlı ul bala bolıp, sol waqıtta BMShnıń azıq-awqat punktı tárepinen balaǵa ǵamxorlıq etilgenligi hám ol 2008-jılı dúnyadan ótkenligi haqqında xabarlanǵan. Bul maǵlıwmattı Meri Nyaluak degen hayal da maqullaǵan. Onıń aytıwına qaraǵanda, bul súwrettegi qız emes, al Kong Nong atlı ul bala bolıp, ol awıldan biraz uzaqlawda jasaǵan. Bala sol waqıtta ashlıqtan qutılıp qalǵan hám 2007-jılı «temperatura»dan ólgenligin tastıyıqlaydı. Basqa dáreklerde bolsa, onıń bezgekten ólgenligi keltirip ótilgen. Keyinirek fotograftıń atın aqlaw maqsetinde rejissyorlar tárepinen birneshe kinofilmler súwretke alınadı.

Siltemeler[redaktorlaw | derekti jańalaw]

  1. Karinform.uz
  2. Kevin Carter // Luminous-Lint (англ.) — 2005.

'