Abdireyim Sultanov

Tuwılǵan sánesi	15-oktyabr 1930(1930-10-15)
Qaytıs bolǵan sánesi	15-sentyabr 1992(1992-09-15) (61 jasta)

Abdireyim Sultanov-Ózbekstan hám Qaraqalpaqstan respublikalarına xızmet kórsetken kórkem-óner ǵayratkeri, ataqlı kompozitor, dirijyor, muǵallim, Ózbekstan kompozitorlar awqamınıń aǵzası, jámiyetlik ǵayratker sıpatında keńnen tanılǵan. A.Sultanov 1930-jılı Shımbay qalasında puqara shańaraǵında tuwılǵan. Onıń saz sáwbetke uqıplılıǵı jaslayınan baslanǵan. Mektepte oqıp júrip kórkem háweskerler dógeregine qatnasqan hám duwtar, mandolina, skripka sazların shertip úyrengen. 1943-1949-jılları A.Sultanov Berdaq atındaǵı mamleketlik filarmoniyada skripkashı sázende bolıp isledi. Jas talant iyesi usı jılları daslepki namaların dórete basladı hám oqıp bilim alıwǵa talpındı. 1949-1955-jılları ol Tashkent mámleketlik konservatoriyanıń xalıq sazları fakultetinde oqıydı. Sonıń menen qatar A.Sultanov konservatoriyanıń ataqlı kompozitorları hám professorları B.Najedin, B.F.Gienko, G.Mushel`den kompoziciya, muzika doretiwden qosımsha sabaqlar aladı. A.Sultanov konservatoriyanı pitkergennen keyin 1955-jıldan omiriniń aqırına shekemgi 40 jılǵa jaqın dáwirde oziniń talantın hám jigerin Qaraqalpaqstan muzika mádeniyatınıń rawajlanıwına baǵıshladı. Usı dáwirde ol muzikalı drama hám komediya teatrınıń bas dirijyorı, Berdaq atındaǵı filarmoniyanıń, televidenie hám radio esittiriw komiteti xalıq sazları orkestriniń kórkemlik jaqtan basshısı hám bas dirijyorı, Nokis muzika xoreografiya uchilishesiniń oqıw isleri boyınsha direktordıń orınbasarı hám muǵallimi, №3 Nokis balalar mektebiniń direktorı /1957-1967/ Ózbekstan kompozitorlar awqamınıń Qaraqalpaqstan kompozitorlar shólkemlestiriw komitetiniń baslıǵı hám /1991-1992/ Qaraqalpaqstan kompozitorlar awqamınıń baslıǵı lawazımların atqardı.