Berdaq - Xalıq ushın

QARAQALPAQ WİKİPEDİASININ' MAG'LIWMATI
Jump to navigation Jump to search

Xalıq ushın (Berdaq)

Jigit bolsan' arıslanday tuwılg'an
Xızmet etkil udayına xalıq ushın,
Jigit bolsan' arıslanday tuwılg'an
Hesh qashanda jumıs etpes o'zi ushın.

O'zi ushın is eter aqılg'a zayıl,
Bolıp usınday zamang'a qayıl,
El qıdırg'an qıdırımpaz gil sayil,
Jumıs etpes hesh waqıtta xalıq ushın.

Zalımlar tın'lamas ma'ximnin' zarın,
Olar oylar o'zlerinin' on'arın,
Hesh waqitta zalım qolında barın
Jaratpaslar bar bolsada xalıq ushın.

Jetersen' muratqa xızmetler etsen',
Elatin' siltese g'ayri elge ketsen'
Dushpanin' har qashan basina jetsen'
Ayanbag'il hikmetin'di xalıq ushın.

Berdimurat, oylap aytqıl so'zin'di,
Ko'terme lap urip, tekte o'zin'di,
Qizartpag'ay halqın' senin' juzin'di
Qoldan kelse xızmet etkil el ushın.

Jigit bolar jigit adam ertedi,
Aytqan so'zin paldan sheker etedi,
Aytsa bir so'z iqrarına jetedi,
Sog'an megzes xızmet eger xalıq ushın.

Oyshil jaqsi jigit bilimpaz keler,
Aytqan ga'plerine tusimpaz keler,
Aqilsızdın' qasiyeti az keler,
Aqmaqlar hesh xızmet etpes xalıq ushın.

Aqil adam so'zler ertpes izine,
Sho'p salmas yarının' ha'rgiz ko'zine,
Baqmas ha'ma'xremnin' hasla juzine,
Shular xızmet eter ba'rxa xalıq ushın.

Ermes jaqsi pasıqlardın' so'zine,
Ko'p berilmes o'z basının' ha'zine,
G'ayrat berip o'lgeninshe o'zine,
Xızmet eter mudam ullı xalıq ushın.

Jaqsının' uyine adam ko'p keler,
Jaman bolsa onın' ko'zi jep keler,
Qurı tili menen "ag'a" - dep keler,
Bular xızmet etpes heshuaq xalıq ushın.

Jaqsi adam dushpanların kuldirmes
Qoldan kelse ana da'uran surdirmes.
Bo'ri arig'i hesh waqitta bildirmes,
Sol jigittin' janı qurban xalıq ushın.

Isin'de jigitler, qamliq bolmasin,
G'umshalansa gulin' ha'rgiz solmasin,
Bilek kushli bolip a'lin' talmasin,
xızmet a'yle qolin'izda bar ushın.

Dosliq penen ha'r bir iske taq tursan'
Jan ayamai el-jurt ushın is qilsan',
Qayg'ilanbay ulli iske qol ursan',
Sonda menin' kewlim piter xalıq ushın.

G'osh jigittin' ma'det bolsa elati,
Hesh uaqitta kemlik qilmas quwati,
Izinde qaladi jigittin' ati,
Qalis xızmet etse eger xalıq ushın.

Bul zamanda ja'biriw-japa shegermen,
Qara ko'zden qanli jazlar to'germen,
zalımlardin' jabirin aytip so'germen,
Kuygenlikten jan qiynalar xalıq ushın.

Bolmadi bir darqan ma'nzil ma'kanim,
Za'har- zaqqim boldi iship-jegenim,
Bolmadi aytsam da menin' degenim,
Kewil jubatpasam tekte xalıq ushın.

Quwat bergei alla na'zik bellerge,
Ma'wsim bergei taza ashilg'an gullerge,
Bahit kelermeken bizin' ellerge???
O'lgenshe aytarman so'zdi xalıq ushın.

A'jel jetip o'lsem bul kunde o'zim,
Keinimde qalarlar taryip bop so'zim,
Ko'rdi ne zamandi tirimde ko'zim,
Parqin bilgen xızmet eter el ushın.

Berdimurat tin'lap so'zindi ko'rgil.
Jurgen soqpag'in'nan izin'di ko'rgil,
G'amgun' shekpe, g'ariplerge ko'l bergil,
Sonda is etkenin' mo'hminler ushın.

Ko'rsen' qaytarma'gil dostin' nazerin,
Qoldan kelse, qurg'il sxalıq bazarin,
O'tkermegil dosqa ga'ptin' h'azarin,
Doslar xızmet eter yarani ushın...

Jamanlarda qasinan qon'si ko'shirer,
O'zinin' dedikli antin ishirer,
Jaqsi adam bolsa giyne keshirer,
Sonda rawazlanar kewlin' el ushın.

Jaman adam bilmes ga'pinin' parqin,
Ba'rqulla jamanlar ag'ain-halqin,
Ko'teremen deyip o'zinin' danqin,
Udayina ziyan eter xalıq ushın.

Jaqsi adam so'z ma'nisin an'laydi,
Jaman adam pasiq so'zdi tin'laydi,
Aytsan' ha'rgiz aqilin'di almaydi,
Kewlim menin' uayran bolar sol ushın.

Dushpannan g'aplette tappadim sawa,
Qurg'aq so'zdi aytip , demen'ler "awa",
Jas ulkenlerin'nen aldinlar duwa,
Paydasi bolarma g'arip el ushın.

Er jigittin' atin hayal shig'arar,
Jamani sezilse jigit ne qilar?
Jari jolda jaman sirin aldirar.
Olardin' keregi bolmas xalıq ushın.

Jamannan ul tuwsa atag'a tartar,
Kun sanap ga'zzapliq qisleti artar,
xalıqqa jaqpas, kesapatli jol tutar,
Ondaydin' paydasi bolmas xalıq ushın.

So'ile Berdimurat, so'zleme yalg'an,
Bul dun'ya uzaq jol atan'nan qalg'an.
Qor bolmas jaqsinin' aqilin alg'an,
Jaqsilar xızmetin etpes o'zi ushın.

Oylansam so'z keler izbe-iz o'zi,
O'zi emes duzeter aqildin' tezi,
Joyilmas jaqsinin' aytqan har so'zi,
Kewilim barjai tabar aytsam sol ushın.

Shayir edim, ko'zim ko'rgenin jazdim,
Ko'kiregimnin' sezip bilgenin jazdim,
Zaman qisletiinen sarg'aidim-azdim,
Bolar ma dep jaqti kunler xalıq ushın.

Atim Berdimurat, men xalıqtin' quli,
Sa'harda sayrag'an sha'yda bu'lbili,
On gulinen ashilmadi bir guli,
Degenine jete almadi xalıq ushın.