Duayt Devis
| Tuwılǵan sánesi | 5-iyul 1879[1] |
|---|---|
| Qaytıs bolǵan sánesi | 28-noyabr 1945[1] (66 jasta) |
Duayt Filli Devis (Dwight Filley Davis) - amerikalı tennisshi, siyasatshı, dúnya júzlik erler arasındaǵı rásmiylestirilmegen komandalıq jarıstıń shólkemlestiriwshisi. Garvard universitetiniń talabası Devis laun tennis boyınsha dem alıs waqıtları Massachusetstegi lagerde qızıǵa basladı. 1898-jılı AQShtaǵı universitet chempionatında kurslası X.Uord penen birge chempion boldı. 1899-jılı Devis penen Uord AQSh chempionatında juplıq razryadta chempionlıqtı jeńip aldı hám ol ataqtı úsh jıl qatara uslap turdı. 1898-jılı Devis finalda M.Uitmen menen oynadı hám tórt sette utıstı qoldan jiberdi. 1901 jılı X.Uord penen birge Uimbldonnıń Chellendjer raundında oynadı hám sol waqıtlardaǵı Angliyalı aǵalı-inili Doxertlarǵa utılıp qaldı.
Eń úlken tabıs óziniń dúzgen "Shaqırıw kuboginde" boldı, ol 1900-jılı birinshi ret oynadı. Ol Bostonda Amerikalılar menen Britaniya atawları arasında bolıp ótti. Devis jekelik hám juplıq oyınlardı (X.Uord penen) utıp shıqtı. Biraq haqıyqatında Britaniyalılar ol jarısqa onsha kúshli emes oyınshılar menen kelgen edi. Devis tennis karerasın qoyǵannan keyin siyasiy hám áskeriy jumısların jaqsı alıp bardı.
General Devis AQShtıń qorǵanıw ministri (1925-1929 jj), keyin ala Fillipinde general-gubernator bolıp isledi. Devis shep qol menen oynap artqı sızıqta hám setkanıń qasında ózine isenimli oyın alıp bardı. Onıń texnikasında eń kúshlisi toptı shıyırıp uzatıp beriw edi. Urardıń aldında qoldıń barmaqları menen toptı shıyırıp jiberiwi bunday urıwlardan soń top qaptalǵa ushıp ketiwi múmkin edi, sonıń ushın bunday uzatıp beriw eń qıyın esaplanar edi.