Fotoreportaj

Fotoreportaj belgili bir mánige iye emes. Yaǵnıy házirgi zaman praktikasında bul termin astında túsiriw jolların izertlegenshe, informaciyalıq waqıya yaki qubılıstı kórsetiw ushın birneshe súwretten paydalanıwǵa tuwra keledi. Jeke súwret arqalı sol mezgillik waqıyanıń elementlerin ashıp kórsetiw múmkin emes. Izbe-izlik penen súwretke alınǵan, túsindirmeli sózlikke iye shıǵarmanı fotoreportaj dewge boladı. Fotoreportajdıń tuwılıwı, qáliplesiwi de kúndelikli baspa menen baylanıslı. Fotoreportajdıń birinshi qádemlerin «Ogonek» jurnalında kóriwge boladı. Yaǵnıy usı jurnalda «Qara teńizde burın bolıp kórmegen dawıl» fotoreportajı berilip, ol altı súwretti qamtıǵan halda qısqasha túsindirmeli tekstten turadı. Fotoreportaj tuwralı 20-30 jılları kúndelikli baspasózde pikirler berip bardı.

Janrdıń maqseti - bizdi qorshaǵan waqıyalardı súwretlew. Eń baslı másele, jámiyetlik turmıstaǵı waqıyanı anıqlaw, ayırıw hám onı kórgizbeli etip oqıwshıǵa jetkeriw bolıp esaplanadı. Fotoreportajǵa tán qásiyet - kóp kadrlılıq. Bul - waqıya haqqında tolıǵıraq maǵlıwmat beriw ushın qollanıladı. Bul janrdıń fotozametkadan ózgesheligi, bunda fabula menen syujetti kóriwge boladı. Usı fabula hám syujettiń baylanısıwı menen janr qáliplesedi. Bul janr da fotozametkanıń kim, ne, qay jerde, qashan degen sorawlarına juwap bere otırıp, qosımsha eń baslı fotoreportajda «qalay» degen sorawın alǵa súredi.

Fotoreportaj oqıwshıǵa bolıp ótken áhmiyetli waqıya haqqında tolıq túrde esap berip, onıń qalay ótkenligin ashıp kórsetedi. Fotopublicistikanıń bunday túrine xronikalı fotoreportaj yamasa fotoreportaj-esap deymiz. Fotoreportajdıń bul túrine avtor hesh qanday pikir qospaydı. Eger avtordıń pikiri, kóz-qarası menen berilgen fotoreportaj bolsa ol ekinshi túrge-túsindirip kórsetiwge negizlengen fotoreportaj deymiz.

Birinshisi, fotoreporter qanday da bir waqıya haqqında informaciya bergende paydalanılsa, ekinshisi ol waqıyanı analizlegende kerek boladı.