Karam Orazov
 | Bul maqalada derekler kórsetilmegen. |
 | Bul maqala Wikipedia qaǵıyda hám talaplarına say bolıwı ushın wikilestiriliwi kerek. |
Karam Orazov (1947-2017-jj.) – baspasóz tarawınıń pidayı xızmetkeri, belgili fotojurnalist.
Ómiri[redaktorlaw | derekti redaktorlaw]
Karam Orazov 1947-jılı Kegeyli rayonı Xalqabad elatında tuwıldı. Ol orta mektepti pitkergennen soń miynet jolın «Sovet Qaraqalpaqstanı» gazetasında korrektor bolıp jumıs islewden basladı. Bunnan soń Qaraqalpaq mámleketlik pedagogikalıq institutınıń rus tili hám ádebiyatı fakultetinde bilim aldı. Oqıwın pitkergennen soń balalar gazetası bolǵan «Jetkinshek» gazetasında fotojurnalist, bólim baslıq, sońınan «Qaraqalpaqstan jasları», «Sovet Qaraqalpaqstanı» gazetalarında fotojurnalist, 1990-jıldan baslap húrmetli dem alısqa (2007 – jılı) shıǵaman degenshe «Nókis haqıyqatı» (házirgi «Paytaxt») gazetasında fotojurnalist bolıp islep keldi.
Dóretiwshiligi[redaktorlaw | derekti redaktorlaw]
1973-jıldan baslap Karam Orazov Ózbekstan jurnalistleri awqamı aǵzası boldı. Ol miynet jolı dawamında ótkir qálemi hám miynet súygishligi menen belsendilik kórsetip, fotojurnalistika baǵdarınıń rawajlanıwına óziniń salmaqlı úlesin qostı. Karam Orazovtıń túsirgen fotosúwretleri Tashkent qalasındaǵı «Правда Востока» gazetası, sonday-aq, Moskvadaǵı «Юность» jurnallarında jiyi járiyalanıp turdı. Fotojurnalist tek súwretke túsiriw menen sheklenbesten, ózi súwretke túsirgen ilajlar haqqında qaraqalpaq hám rus tillerinde maqalalar jazdı. Kóplegen shákirtleri házirgi kúnde respublikamız baspasózinde jemisli miynet etip atır. Karam Orazov qay jerde, qanday lawazımda jumıs islemesin óziniń shólkemlestiriwshilik uqıbı, talapshańlıǵı menen kózge túsip, kásiplesleri arasında úlken abıroyǵa eristi. Ómiriniń sońǵı jıllarında publicistikanıń kórkem-publicistikalıq janrlarında dóretiwshilik etip, birneshe feletonları jergilikli gazetalarda basıldı. 1970-80-jıllarda M.Elewsinov, K.Kim, A.Muratov, B.Allashev, J.Jaqsımuratov, J.Xojabaev usaǵan fotojurnalistler baspasózge kelip aralastı hám tabıslı miynet etti.
Sıylıqları[redaktorlaw | derekti redaktorlaw]
Onıń islegen miynetleri húkimetimiz tárepinen ılayıqlı bahalanıp, Qaraqalpaqstan Respublikası Joqarǵı Keńesiniń «Húrmet jarlıǵı» menen eki márte sıylıqlandı.
Foto súwretleri[redaktorlaw | derekti redaktorlaw]
