Publitsistika

Publitsistika (latınsha - publikus) jámiyetlik sózinen alınǵan bolıp, turmısımızdıń hár qıylı tarawlarındaǵı áhmiyetli máselelerdi, faktlerdi, qubılıslardı úyreniwshi hám avtordıń sotsial idealı ólshemi menen bahalawshı, kún tártibinde turǵan máselelerdi sáwlelendiriwi sebebinen dáwir ruwhın beriwshi, keń jámiyetshilikke arnalǵan shıǵarmalar bolıp tabıladı. Publitsistika ómirimizde bolıp atırǵan barlıq faktlerdiń, qubılıslardıń, waqıyalardıń tez arada keń jámiyetishilikke málimleniwi, olar haqqında pikirlew, juwmaqlar shıǵarıw, aldaǵı wazıypalardı anıqlaw hám orınlaw, jáne orınlanıw barısın xabarlaw hám analizlew, juwmaqlar shıǵarıw h.t.b. sıyaqlı ómir aǵısınday úzliksiz protsess.

Publitsistikanıń maqseti, birinshiden, ekonomikalıq, siyasiy hám mádeniy jańalıqlardı, ómirdegi sotsial áhmiyetke iye barlıq faktlerdi, waqıyalardı, qubılıslardı operativ túrde xalıqqa jetkerip beriw. Ekinshiden, maǵlıwmat hám hújjetlerge súyeniw arqalı jámiyetlik pikirge tásir jasaw, insaniyattıń jaqsılıqqa, jarqın keleshekke talpınısların quwatlawdan ibarat.

Publitsistika dáwir menen teń qádem taslap, turmıs mashqalaları haqqında pikirleydi. Jetiskenliklerdi en jaydırıw hám kemshiliklerdi saplastırıw jolların, bul máseleler ruwhıy turmıstıń basqa tarawlarında keń tarqalmay atırıp-aq, juwaplar izleydi. Ádebiyat, kórkem óner, arxitektura hám taǵı basqa tarawlarda keleshekte úlken polotnolardıń dóretiliwi ushın bay materiallardı toplap beredi.