Qanatbay Ismaylov
| Ismaylov Qanatbay Ábdireyimovich | |
|---|---|
 | |
| Tuwılǵan sánesi | 26-fevral 1959 (66 jasta) |
| Tuwılǵan jeri | Xojeli rayonı |
| Ilimiy tarawı | fizika-matematika |
| Jumıs orınları | Qaraqalpaq mámleketlik universiteti |
| Bilim alǵan jeri | Tashkent mámleketlik universiteti |
| Ilimiy dárejesi | fizika-matematika pánleri doktorı |
| Ilimiy ataǵı | professor |
| Belgili tezis(ler)i | «Galliy arsenid qurılması dúzilisinde joqarı maydan hám radiatsiya tásiri» |
| Perzentleri | 4 |
| Sıylıqları | «Ózbekstan ǵárezsizliginiń 10 jıllıǵı» (2001) «Ózbekstan Konstituciyasına 25 jıl» (2017) «Qaraqalpaqstan Respublikasında xızmet kórsetken pán ǵayratkeri» (2019) «Ózbekstan Konstituciyasınıń 30 jıllıǵı» (2022) |
Qanatbay Abdreymovich Ismaylov (1959-jıl 26-fevral, Xojeli rayonı, Qaraqalpaqstan ASSR, Ózbekstan SSR) — qaraqalpaqstanlı hám ózbekstanlı alım, fizika-matematika pánleri doktorı, professor.
Ómirbayanı
[redaktorlaw | derekti redaktorlaw]Qanatbay Ismaylov 1959-jılı 26-fevralda Xojeli rayonında tuwılǵan. 1976 -jılda Nókis rayonındaǵı 3-sanlı orta mektepti pitkerip, sol jıldıń ózinde Tashkent mámleket universitetiniń fizika fakultetine oqıwǵa qabıllanadı. 1981-jılı universitettiń «Yarım ótkizgishler hám dielektrikler fizikasıı» qánigeligi boyınsha tamamlaydı. 1982—1983-jıllarda Ukraina SSR Pánler akademiyası yarım ótkizgishler fizikası institutında stajyor-izertlewshi lawazımında isleydi. Keyin 1983-jılda Ukraina SSR Pánler akademiyası Yarım ótkizgishler fizikasi institutı aspiranturasına oqıwǵa qabıl etilip, 1986 -jılda usı instituttı tamamlaydı. 1986—1991-jıllarda Nókis mámleket universiteti fizika fakultetiniń ilimiy tekseriw laboratoriyasında ilimiy xızmetker retinde iskerlik alıp baradı.
1995—1998-jıllarda Qaraqalpaq mámleket universitetinde ilimiy, ruwxıy hám bilimlendiriw jumıslar boyınsha prorektor lawazımında iskerlik alıp bardı. 1998—2005-jıllarda Ózbekstan Pánler akademiyası Qaraqalpaqstan bólimi «Tábiyiy pánler kompleksi» institutı direktorı, Qaraqalpaqstan Respublikası Joqarǵi Keńesi komitet baslıǵı, Qaraqalpaqstan Respublikası Ministrler Keńesi baslıǵı orınbasarı hám Qaraqalpaq mámleket universiteti oqıw jumısları boyınsha prorektor lawazımlarında iskerlik alıp barǵan. 2005—2011-jıllarda Fizika fakulteti dekanı hám 2011-jıldan baslap házirgi kúnge shekem «Yarım ótkizgishler fizikası» kafedrası basqarıwshısı lawazımında islep atır. 1994—1999-jıllarda hám 1999—2004-jıllarda Qaraqalpaqstan Respublikası Joqarǵı Keńesi deputatı bolıp saylanǵan.
Shańaraǵı
[redaktorlaw | derekti redaktorlaw]Shańaraqlı, 4 perzenti bar.
Ilimiy iskerligi
[redaktorlaw | derekti redaktorlaw]1988-jılda Ukraina SSR Pánler akademiyası Yarım ótkizgishler fizikası institutında fizika-matematika pánleri doktorı, professor Txorik Yuriy Aleksandrovich hám texnika pánleri doktorı Konakova Raisa vasilevnalar basshılıǵında «Kóshki-tranzit diodlarınıń qásiyetlerine sirtqı qubılıslardıń tásiri» temasında kandidatlıq dissertatsiyasın qorǵaydı. 1992—1994-jıllar dawamında Ukraina Pánler akademiyası Yarım ótkizgishler fizikası institutı doktorantı, 1994—1995-jılları Qaraqalpaq mámleket universiteti yarım ótkezgishler fizikası kafedrası docenti lawazımında iskerlik júritedi. 1995-jılda Ózbekstan Pánler akademiyası «Quyash — Fizikası» ilimiy islep shıǵarıw birlespesi janındaǵı Fizika-texnika institutında «Galliy arsenid qurılması dúzilisinde joqarı maydan hám radiatsiya tásiri» temasında doktorlıq dissertaciyasın qorǵaydı. Qanatbay Abdreymovich Ismaylov «Yarım ótkizgishler fizikası» tarawı boyınsha Qaraqalpaqstan Respublikasındaǵı birinshi pán doktorı bolıp tabıladı.
Miynetleri
[redaktorlaw | derekti redaktorlaw]400 den artıq ilimiy jumıslar, sol menen bir qatarda, 3 monografiya, 2 sabaqlıq, 4 oqıw qollanba, 8 oqıw-stilistikalıq qollanba avtorı[1].
Sıylıqları
[redaktorlaw | derekti redaktorlaw]2009-jılda Qaraqalpaqstan Respublikası Xalıq bilimlendiriw bilimdanı kókirek nıshanı, 2019-jılda «Qaraqalpaqstan Respublikasında xızmet kórsetken pán ǵayratkeri» eń húrmetli ataǵı menen sıylıqlanadı. 2001-jılda «Ózbekstan ǵárezsizliginiń 10 jıllıǵı» kókirek nıshanı, 2017-jılda «Ózbekstan Konstituciyasına 25 jıl» hám 2022-jılda «Ózbekstan Konstituciyasınıń 30 jıllıǵı» estelik nıshanları menen sıylıqlanadı[1].