Quraq

Quraq – bul bir buyımda reńi hám fakturası hár túrli bolǵan gezlemeniń qaldıqların birlestiriw. Bul usıl menen kópshiktiń tısları, kórpe, divan hám stul jawǵıshlar, gilemsheler, sonıń menen birge, kiyimler ushın bezek hám tolıqtırıwshı detallardı da islewge boladı. Quraq texnologiyasında qálegen gezlemeden, hám taza, hám aldın paydalanılǵan gezlemeden de paydalanıw názerde tutıladı. Taza gezlemeni paydalanıwdan aldın dekatirovka (jipek hám jún gezlemelerdi ózgermewi ushın puw yamasa qaynaǵan suw menen qayta islew usılı), puwlaw kerek, sebebi bir buyımda eki túrli gezlemeniń paydalanılıwı nátiyjesinde, buyım juwılǵannan keyin óz kórinisin ózgertiwi múmkin. Dáslep paydalanılǵan gezlemeniń bóleklerin bolsa kraxmallaw hám utyuglew kerek. Paxta talshıqlı gezleme qaldıqları islew ushın qolaylı esaplanadı. Olardan uslaǵısh, salfetkalar, sháynek ushın ısıtqıshlar, kórpe, gilemshe, kópshik tısları hám hátteki kiyimler de tigiwge boladı.