Taqıyatas gidrouzeli

Taxiyatas gidrouzeli — Ámiwdáryanıń tómengı bóliminde qurılǵan gidrotexnika imáratı; qurılıs 1966-jılda baslanǵan, 1976-jılda qurıp pitkezilgen. Topraqlı toǵan hám tosıqlı darwazalardan ibárat. Toǵannıń ulıwma uzınlıǵı 1650 m, eni 32 m, balentligi 4 8 m. Darwazalı bóliminıń uzınlıǵı 470 m, 25 darwazadan ibárat, hárbir darwazanıń uzınlıǵı 16 m. Suw biyikligi toǵan astınan ortasha 5,2 m ge kóteriledi. Gidrouzel darwazaları tolıq ashılǵanda onnan 10500 m³/sek suw ótiwi mónjellengen. Ekki aqırǵı darwaza balıq ótkiziwge maslap qurılǵan. Gidrouzel toǵanı Ámiwdáryanın ekki bólegin baylanıstıratın kópir wazıypasın hám atqaradı. Avtomobiller qatnaydı. Gidrouzeldiń shep bóleginde shlyuz qurılǵan. Onıń boyı 65 m, eni 18 m. T.g . barpa etiliwi menen dáryanıń oń qirǵaǵınan baslanatuǵın Qızketken kanalına 7 darwazalı suw shıǵarǵıshrastlaǵısh qurıldı. Hárbir darwazanıń uzınlıǵı 10 m. Dúzetkishtiń maksimal suw sarıplawı 425 m³/sek. Toǵannan 300 m tómendegı dáryanıń shep qırǵagınan baslanatuǵın Suwenlli kanalına suw beretuǵın suw ótkiziw kanalı qazılǵan. Gidrouzel Qaraqalpaqstan Respublikası, Xorezm wálayatı, Túrkmenistannıń Tashawız wálayatında qariyp 1 mln. gektar jerlerdi suwǵarıw imkániyatın beredi.