Feodosiya

Feodosiya — Ukrainanıń Qrım Respublikasındaǵı qala. Qrım yarım araldıń qubla-arqa jaǵasında. Simferopoldan 116 km shıǵısta. Qara teńiz jaǵasındaǵı port, temirjol stanciyası, balneologiyalıq ıqlım kurortı. Xalqı 75 mıń adam shamasında (2001).

Feodosiyaǵa eramızǵa shekemgi VI ásirdiń ortalarında tiykar salınǵan. Ekinshi jáhán urısınan keyin qala qayta tiklendi, kurort oraylarınan birine aylandı. Jazı ıssı, qısı jıllı, jılına 360 mm jawın jawadı. Emlew quralları: ıqlım, teńizde shomılıw, mineral bulaq suwınan ishiw, Ajikól balshıǵı. Qalada azıq-awqat (sút, temeki hám basqa zavodlar), qurılıs materialları, metallsazlıq sanaatı bar. Mebel, ofset, oyınshıq fabrikaları bar. Úlketanıw muzeyi, I.K.Ayvazovskiy atındaǵı (Feodosiyada tuwılǵan) kartinalar galereyası, orıs jazıwshısı A.S.Grinniń kórkem ádebiyatqa baylanıslı memoriallıq muzeyi iskerlik kórsetedi. XIV-XV ásirlerge tiyisli genuyalıqlar qorǵanı qaldıqları, Ioann Predtecha, Stefan, Arxangellar, Sergiy shirkewleri (hámmesi XIII-XIV ásirler), Muftiy Jome meshiti (XVII ásir) sıyaqlı arxitekturalıq estelikleri saqlanǵan.

Derekler

ÓzME, Birinshi tom, Tashkent, 2000-jıl